اعجاز مہر، ریاض سہیل بی بی سی اردو ڈاٹ کام، اسلام آباد، کراچی

	ممالک جہاں ایک دوسرے کے مچھیروں کو رہا کرتے رہے ہیں وہیں پر وقت فوقتاً ان کی گرفتاریاں بھی جاری رہتی ہیں

پاکستان کے دفتر خارجہ سے جاری ہونے والے بیان میں بتایا گیا ہے کہ حکومت نے خیر سگالی کے طور پر اکہتر مچھیرے رہا کرنے کا فیصلہ کیا ہے۔

دوسری جانب پاکستان نے انڈیا کے دو ماہی گیر بچوں کو ہفتے کے روز انڈیا کے حکام کے حوالے کیا جنہیں کراچی کے ہوائی اڈے سے پی آئی اے کے طیارے میں ایک بھارتی سفارتکار سمیت ممبئی کے لیئے روانا کیا گیا۔

دفتر خارجہ کے بیان کے مطابق پاکستانی سمندری حدود میں مچھلیاں پکڑنے کے الزام میں گرفتار بھارتی مچھیروں کو تیس مئی کو واہگہ کی سرحد پر انڈیا کے حکام کے حوالے کیا جائے گا۔

جبکہ پاکستان کے سرکاری خبر رساں ادارے نے کراچی میں قائم ’فشرمین کو آپریٹو سوسائٹی‘ کے ذرائع سے خبر دی ہے کہ انڈیا کی حکومت نے بھی انسٹھ پاکستانی مچھیرے رہا کردیے ہیں اور وہ سنیچر کے روز کھوکھرا پار سرحد سے پاکستان پہنچیں گے۔

بھارت سے رہائی پانے والے یہ پاکستانی مچھیرے گزشتہ برس اکتوبر کے بعد گرفتار کیے گئے تھے۔ جبکہ گزشتہ برس ستمبر تک انڈیا دو سو سے زائد پاکستانی مچھیرے رہا کرچکا تھا۔

واضح رہے کہ دونوں ممالک کے درمیان جامع مذاکرات شروع ہونے کے بعد گزشتہ دو برسوں میں ایک دوسرے کے غلطی سے سرحد پار کرنے اور مچھیروں کو درجنوں کی تعداد میں رہا کیا ہے۔

تاہم جہاں ایک طرف دونوں ممالک ایک دوسرے کے گرفتار مچھیروں کو رہا کرتے رہے ہیں وہیں پر وقت فوقتاً گرفتار بھی کرتے رہتے ہیں۔

ادھر پاکستان کے دفتر خارجہ نے بتایا ہے کہ دونوں ممالک کے داخلہ کے محکموں کے سیکریٹریوں کی سطح پر دو روزہ بات چیت تیس اور اکتیس مئی کو اسلام آباد میں ہوگی۔

داخلی امور کے سیکریٹری اپنے اپنے ممالک کے سویلین قیدیوں کی رہائی کے بارے میں بات چیت کریں گے اور ان کی رہائی کے لیے حکمت عملی بھی وضح کریں گے۔

ماہی گیر بچے
انڈیا کے دو ماہی گیر بچوں سات سالہ پاؤش رام جی اور آٹھ سالہ بھارت بابو کو بیس نومبر کو پاکستان کی حدود میں غیر قانونی طریقے سے داخل ہونے کے الزام میں گرفتار کیا گیا تھا۔

دونوں بچوں کو ان کے رشتے داروں کے ساتھ مچھلی کا شکار کرتے ہوئے پکڑا گیا تھا۔
ہوائی اڈے پر بچوں کی ان کے رشتے داروں سے ٹیلی فون پر بات چیت بھی کروائی گئی، اور روانگی سے قبل انصار برنی ٹرسٹ کی جانب سے تحائف بھی دیئے گئے۔