ہارون رشید بی بی سی اردو ڈاٹ کام، پشاور

	پانی کی قلت کے باعث شہری بعض اوقات مضر صحت پانی استعمال کرنے پر مجبور ہوجاتے ہیں

یہ مسئلہ ایک ایسے وقت سر اٹھاتا ہے جب صوبہ سرحد نہری نظام کے تحت ملنے والے اپنے حصے کے پانی سے بھی پوری طرح استفادہ نہیں کر پاتا۔ صوبوں کے درمیان پانی کی تقسیم کے فارمولے کے تحت ملنے والا بیس سے پچیس فیصد پانی کو استعمال میں نہیں لایا جا سکتا۔

ضلع مردان کے قدیم گاؤں طورو جہاں زراعت کا زیادہ انحصار ٹیوب ویلوں کے ایک کاشکار ماجد خان پانی کی دستیابی پر کہتےہیں کہ پانی کی سطح مسلسل گرنے اور بجلی کی کمیابی یا گرانی کی وجہ سے ان کے لیئے اپنے کھیتوں کو سیراب کرنا دن بدن مشکل ہوتا جا رہا ہے۔

’پہلے ایک بیگا زمین گھنٹے دو میں سیراب ہوجاتی تھی مگر اب تو گرم موسم اور بجلی نہ ہونے کی وجہ سے چار پانچ گھنٹے لگ جاتے ہیں۔‘

	پانی قلت کی وجہ سے بہت سی جگہوں پر عورتوں کو کئی کئی میل سے پانی لانا پڑتا ہے

پشاور کے بھانہ ماڑی علاقے میں ایک نالی میں لگے سرکاری نلکے کے پاس بالٹی پکڑے اپنے نمبر کا انتظار کر رہے ستر سالہ امین خان سے یہاں سے پانی لیجانے کی وجہ دریافت کی تو ان نے کہا ’یہاں کونسا دریا ہے یا جھیل ہے جہاں سے پانی لائیں۔ یہ سرکاری نلکے ہی ہیں جو پانی مہیا کرتے ہیں۔‘

وہیں کھڑے عمر خان نے گفتگو میں شامل ہوتے ہوئے نشاندہی کی کہ پانی کا پائپ رس بھی رہا ہے اور اس سے نالی کا گندا پانی داخل بھی ہوتا ہے۔ ’ایک تو پانی ضائع ہو رہا ہے دوسرا جو آ رہا ہے وہ بھی پینے لائق نہیں۔‘

اس نلکے کے گرد جمع لوگوں کا کہنا تھا کہ گرمیوں میں پانی کی مقدار کم ہوجاتی ہے۔ ’اکثر گرمیوں میں ٹیوب ویل خراب ہوجاتے ہیں جس سے لوگ بوند بوند کو ترس جاتے ہیں۔‘

اس بات چیت سے واضع ہے کہ پانی کی کمی کی ایک وجہ پانی کا زیاں بھی ہے۔ جو ہے اس کا بھی بہتر استعمال نہیں ہو پا رہا ہے۔

	گرمی کی شدت اور پانی کی کمیابی سے پرندے بھی پریشان ہیں

اعظم آفریدی نے شکایت کی کہ صدر جنرل پرویز مشرف نے ریفرینڈیم کے موقعہ پر پشاور میں ایک ریلی سے خطاب میں دو سو ٹیوب ویلوں کے لیئے فنڈ مہیا کرنے کا اعلان کیا تھا تاہم وہ وعدہ آج تک پورا نہ ہوسکا۔

ان کاکہنا ہے کہ موسم گرما میں پانی کی کمی کی وجہ سے شہر کا امن وامان بھی خطرے میں پڑ جاتا ہے۔

جب معمول کے حالات میں پانی کا مسئلہ اتنا سنگین ہے تو محکمہ موسمیات کی پیش گوئیوں کے مطابق اس سال خشک سالی سے صورتحال کیا ہوگی۔ صوبہ کے بارانی اور جنوبی اضلاع آج بھی پانی کی شدید کمی کا شکار ہیں۔ تاہم صوبائی حکام خشک سالی کی پیش گوئیوں سے کوئی زیادہ فکرمند دکھائی نہیں دیتے۔

محکمہ آبپاشی کے چیف انجنیر وزیر خان کا کہنا تھا کہ انہیں فل الحال نہری نظام سے ان کی ضرورت کے مطابق پانی مل رہا ہے۔ ’پانی کی صورتحال فل الحال تسلی بخش ہے اور ہمارے پاس پہاڑوں پر برف کے ذخائر کافی ہیں لہذا امید ہے کوئی بڑا مسئلہ پیش نہیں آئے گا۔‘

انہوں نے بتایا کہ ان کی حکومت اضافی پانی کو ذخیرہ کرنے اور ضرورت کے وقت استعمال میں لانے کے لیئے ڈیموں کی منصوبہ بندی کر رہی ہے۔ تاہم انہوں نے اعتراف کیا کہ یہ سب منصوبے ابھی صرف کاغذوں تک محدود ہیں۔

پانی کی مناسب مقدار دستیاب ہونے کے باوجود کاشتکاروں کی شکایات کے بارے میں ان کا کہنا تھا کہ یہ شکوہ اکثر نہر کے آخری سرے پر رہنے والے لوگوں کو ہوتا ہے کیونکہ نہر کے آغاز پر کاشتکار زبردستی پانی زیادہ لے لیتے ہیں۔ ’اس مسئلے کا خشک سالی سے تعلق نہیں ہے۔‘

صوبہ سرحد میں نہری نظام پر انحصار کرنے والے کاشت کار تو شاید ممکنہ خشک سالی سے زیادہ متاثر نہ ہوں لیکن اس سے سب سے بڑا خطرہ صوبہ کے بارانی اور جنوبی اضلاع کو ہے۔ البتہ اس بارے میں صوبائی حکام کی جانب سے پیشگی منصوبہ بندی دکھائی نہیں دے رہی ہے۔

ایسے میں کاشت کار دعاگو ہیں کہ خشک سالی کی پیش گوئی غلط ثابت ہو۔