عدنان عادل بی بی سی اردو ڈاٹ کام، لاہور

	اس سال گزشتہ برس مئی سے زیادہ گرمی پڑ رہی ہے

محکمہ موسمیات کے ڈائریکٹر جنرل قمرالزمان نے بی بی سی کو بتایا کہ گرمی کی موجودہ شدت اٹھارہ مئی تک جاری رہے گی جس کے بعد چند دنوں کے لیے اس میں کمی آئے گی۔

پنجاب کے وزیر صحت طاہر جاوید کا کہنا ہے کہ ہفتہ اور اتوار کے درمیان چوبیس گھنٹوں میں تینتیس سے زیادہ افراد گرمی سے ہلاک ہوئے۔ صوبہ کے مختلف شہروں سے ہلاکتوں اور بچوں کے اسہال میں مبتلا ہونے کی اطلاعات ہیں۔

اس سال بارش نہ ہونے کی وجہ سے مئی میں گرمی کی شدت گزشتہ سال مئی کے مقابلہ میں اوسطاً دو سے تین سینٹی گریڈ زیادہ ہے۔ محکمہ موسمیات

ماہر موسمیات قمر الزمان نے کہا کہ گزشتہ چند دنوں میں گرمی کی شدت کا اندازہ اس بات سے لگایا جاسکتا ہے کہ سندھ کے علاقوں جیسے نواب شاہ، سبی اور جیکب آباد میں درجہ حرارت پچاس سینٹی گریڈ تک پہنچ گیا تھا۔

انہوں نے کہا کہ اس سال بارش نہ ہونے کی وجہ سے مئی میں گرمی کی شدت گزشتہ سال مئی کے مقابلہ میں اوسطاً دو سے تین سینٹی گریڈ زیادہ ہے۔

ماہر موسمیات نے کہا کہ تین دن کے بعد مغرب سے آنے والے موسمی نظام کی وجہ سے گرمی میں عارضی وقفہ آسکتا ہے۔

پاکستان کے محکمہ موسمیات نے اس سال مون سون میں معمول سے کم بارشوں اور خشک سالی کی پیش گوئی کی ہے۔