کاشف قمر بی بی سی اردوڈاٹ کام، کراچی

	شیخ رشید ان دنوں ریلوے کے وزیر ہیں

یہ بات انہوں نے اتوار کو کراچی میں ایک پریس کانفرنس میں کہی۔ اپنے تندو تیز بیانات کے لیے مشہور سابق وزیر اطلاعات شیخ رشید احمد کے پاس ان دنوں ریلوے کی وزارت کا قلمدان ہے۔

لیکن یہ ممکن نہیں تھا کہ شیخ رشید کی وزارت سے متعلق پریس کانفرنس صرف ریلوے تک ہی محدود رہے۔ ہوا بھی ایسا ہی اور سوال جواب ریلوے کے صورتحال سے بڑھ کر ملکی سیاسی منظر نامے تک جا پہنچے۔

اس سوال پر کہ اگر سابق وزرائے اعظم بینظیر بھٹو اور میاں نواز شریف نے زاہدان، کھوکھراپار یا واہگہ کے زمینی راستوں سے پاکستان واپس آنے کی کوشش کی تو کیا ریلوے حکام اس کی اجاز ت دیں گے، شیخ رشید کا جواب تھا کہ دونوں کو واپس آنے سے کوئی نہیں روک رہا جبکہ جیل جانا سیاستدانوں کا زیور ہوتا ہے۔

یاد رہے کہ بطور وزیراطلاعات، شیخ رشید کا ہمیشہ یہ اصرار رہا تھا کہ میاں نواز شریف نے جنرل مشرف کے ساتھ دس برس تک بیرون ملک رہنے کا باقاعدہ تحریری معاہدہ کیا ہے اور وہ اس سے پہلے واپس نہیں آسکتے۔ میاں نواز شریف نے ہمیشہ اس کی تردید کی ہے۔

پریس کانفرنس میں شیخ رشید سے وزارت اطلاعات کی ذمہ داری واپس لیے جانے پر بھی صحافیوں کی توجہ مرکوز رہی کیونکہ سیاسی تجزیہ نگار وزارت اطلاعات سے سبکدوشی کو شیخ رشید کی تنزلی سے تعبیر کررہے ہیں۔

اس سوال پر کہ کیا وزیرستان پر مشرف حکومت کی پالیسی سے اختلاف اس سبکدوشی کی وجہ ہے، شیخ رشید کا کہنا تھا کہ وزیرستان پر اپنے تحفظات پر انہیں کوئی ندامت نہیں ہے اور انہوں نے ان تحفظات کا برملا اظہار کیا تھا۔

شیخ رشید نے بتایا کہ جنرل مشرف نے ان کی اس تجویز کو سراہا ہے کہ ایران سے پاکستان کے لیےگیس پائپ لائن کو موجودہ ریلوے لائن کے ساتھ ساتھ بچھایا جائے۔ ان کے مطابق نہ صرف یہ بلکہ کسی اور بھی پائپ لائن کو اس طرح ریلوے کی زمین پر بچھانے سے ہونے والی آمدنی ریلوے کو بہت بہتر بناسکتی ہے۔

شیخ رشید نے کہا کہ ریلوے نظام کو گوادر تک پھیلایا جائے گا جبکہ چین نے بھی کاشغر تا اسلام آباد ریل رابطے کی تجویز پیش کی ہے۔

وفاقی وزیر نے کھوکھراپار سے براستہ میرپور خاص کراچی تک عام لوگوں کے لیے ٹرین چلانے، نجی شعبے کو اپنی بوگیوں اور انجن کے ساتھ چار ٹرینیں چلانے کی اجازت دینے کا بھی اعلان کیا۔

شیخ رشید نے موجودہ وزیرتعلیم اور آئی ایس آئی کے سابق سربراہ جنرل جاوید اشرف قاضی کے بطور ریلوے وزیر دور میں چین سے بوگیاں اور انجن کی خریداری کے سودوں میں مبینہ بدعنوانیوں کی تفتیش کرانے سے انکار کردیا اور کہا کہ وہ ماضی سے زیادہ حال اور مستقبل پر توجہ دینا چاہتے ہیں۔