ہارون رشید بی بی سی اردو ڈاٹ کام، پشاور

	فوج کی جوابی کارروائی کے نتیجے میں منگل کی صبح تک شیلنگ جاری رہی

صدر مقام میران شاہ سے موصول اطلاعات کے مطابق یہ حملہ دتہ خیل سے شوال کے علاقے ماندہ جا رہے ایک فوجی قافلے پر ہوا۔ اس قافلے میں شامل تین فوجی گاڑیوں پر نامعلوم افراد نے راکٹوں اور خودکار ہتھیاروں سے حملہ کیا۔

ابتدائی اطلاعات کے مطابق اس واقعے میں ایک فوجی ہلاک جبکہ بارہ زخمی ہوئے ہیں۔

ادھر شمالی وزیرستان میں ہی ٹل پکٹ پر نامعلوم افراد نے حملہ کیا۔ جوابی کارروائی میں میران شاہ قلعہ سے رات بھر توپوں اور مارٹر سے گولہ باری کی گئی۔ تاہم اس سے کسی جانی نقصان کی اطلاع نہیں ملی ہے۔

شمالی وزیرستان کے میر علی شہر میں پیر کے روز نقاب پوش افراد نے تقسیم کے لئے آئے اخبارات بطور احتجاج نذر آتش کر دیئے تھے۔

میر علی بازار میں عینی شاہدین کے مطابق دو نقاب پوش افراد نے اخبارات فروخت کرنے والی دوکانوں پر اردو اخبارات کو نذر آتش کر دیا۔ ان نقاب پوشوں کا کہنا تھا کہ یہ اخبارات ان کی بابت جانبداری دکھاتے ہیں اور ان کے خلاف ’شرپسند’ اور ’دہشت گرد’ جیسے الفاظ استعمال کرتے ہیں جوکہ ان کے لیئے قابل قبول نہیں۔

پاکستان حکام وزیرستان میں جاری فوجی کارروائیوں کے دوران ہلاک ہونے والوں کے لیئے ’شرپسند’ اور ’دہشت گرد’ استعمال کرتے ہیں۔