عزیزاللہ خان بی بی سی اردو ڈاٹ کام کوئٹہ

	بلوچستان میں فوجی آپریشن کے خلاف مظاہرے ہوتے رہے ہیں

بی این پی مینگل گروپ کے لیڈرز حبیب جالب ایڈووکیٹ اور جہانزیب جمالدینی نے رات کوئی گیارہ بجے طلب کی گئی ایک اخباری کانفرنس سے خطاب کرتے ہوئے کہا ہے کہ غلام سرور ایک استاد تھے جنہیں آج سفید لباس میں ملبوس اہلکاروں نے مستونگ سے حراست میں لیا اور کوئٹہ پہنچا یا اور تھوڑی دیر بعد غلام سرور کے رشتہ داروں کو فون پر بتایا کہ ان کی لاش سول ہسپتال کوئٹہ سے لے جائیں۔

جہانزیب جمالدینی نے بی بی سی کو بتایا کہ انہیں خدشہ ہے کہ غلام سرور کو پولیس نے ماورائے عدالت تشدد کرکے ہلاک کیا ہے۔ انہوں نے غیرجانبدار میڈیکل بورڈ سے پوسٹ مارٹم کرنے کا مطالبہ کیا ہے اور کہا ہے کہ اس واقعے کی باقاعدہ تحقیقات کی جائیں اور اس واقعے میں ملوث پولیس اہلکاروں کو سزا دی جائے۔

اس سلسلے میں سینیئر سپرنٹنڈنٹ پولیس کوئٹہ غلام محمد ڈوگر سے رابطہ قائم کیا تو انہوں نے ان الزامات کی تردید کی اور کہا کہ غلام سرور دل کا دورہ پڑنے سے ہلاک ہوئے ہیں۔ اس سلسلے میں انہوں نے کہا کہ محکمانہ انکوائری کے احکامات جاری کیے گئے ہیں اور سیشن جج کے ذریعے جوڈیشل انکوائری کرائی جا ئے گی۔ انہوں نے کہا کہ غلام سرور اغوا کے کیس میں مطلوب تھے اور انہیں قانونی طریقے سے گرفتار کیا گیا ہے۔

بلوچ قوم ہرست جماعتوں کے قائدین یہ الزامات عائد کرتے رہے ہیں کہ بلوچستان سے بڑی تعداد میں لوگوں کو غیر قانونی اور غیر آئینی طریقے سے اٹھا کر غائب کر دیا جاتا ہے جس کے بعد ان کا کچھ پتہ نہیں چلتا۔ انہوں نے کہا کہ اس طرح کے 400 سے زیادہ افراد کے نام ان کے پاس موجود ہیں جن میں حافظ سعید اصغر بنگلزئی اور ڈاکٹر حنیف شریف نمایاں ہیں۔