دلاور خان وزیر
ڈیرہ اسماعیل خان |  |
| | | میران شاہ حالیہ مہینوں میں مسلح جھڑپوں کے لیے سرخیوں میں رہا ہے |
پاکستان کے قبائلی علاقے شمالی وزیرستان میں جمعرات کی صبح نامعلوم افراد نے مہمند رائفلز کے ایک قافلے پر اس وقت حملہ کردیا جب یہ قافلہ میران شاہ سے رزمق کے لیے ایک پہاڑی سلسلے سے گزر رہا تھا۔ اس حملے میں سات فوجی ہلاک اور چھبیس فوجی شدید زخمی ہوگئے ہیں۔علاقے میں کشیدگی ہے اور فوج کے گن شِپ ہیلی کاپٹر فضا میں پرواز کررہے ہیں۔ جمعرات کی صبح سات بجے کے قریب شمالی وزیرستان میں ہی میرعلی کے مقام پر سکاؤٹس قلعے پر کئی راکٹ داغے گئے جس کے بعد فوج نے جوابی کارروائی کی۔اس میں بھی کسی کے ہلاک ہونے کی کوئی اطلاع نہیں ہے۔ شمالی وزیرستان کے ہیڈکوارٹر میران شاہ میں فوجی قلعہ پر بدھ اور جمعرات کی درمیانی شب کو گیارہ بجے کے قریب تین راکٹ داغے گئے جو قلعے کے قرب و جوار میں جاگرے۔ اطلاعات کے مطابق فوج نے جوائی کارروائی کی اور دو گھنٹے تک مسلسل مشکوک ٹھکانوں پر توپیں اور مارٹر کے گولے برساتی رہی۔ تاہم کسی جانی نقصان کی اطلاع نہیں ملی ہے۔ اس کے علاوہ بدھ کی شام وزیرستان میں ہی ٹل اسکاؤٹس فورس کی ایک گاڑی میرعلی کے علاقے میں بارودی سرگن کے دھماکے میں تباہ ہوگئی۔ اس میں ٹل اسکاؤٹس کے پانچ جوان بھی زخمی ہوگئے جن میں سے دو کی حالت شدید بتائی گئی ہے۔ دھماکہ شام کے چھ بجے اس وقت ہوا جب ٹل اسکاؤٹس فورس کا ایک قافلہ تینوا میں موجود اسکاؤٹس فورس کے لیے خوراک لے جارہا تھا۔ زخمیوں کو ہسپتال میں داخل کرادیا گیا ہے۔ شمالی اور جنوبی وزیرستان میں حالیہ مہینوں میں مشتبہ طالبان اور القاعدہ کی جانب سے فوجی ٹھکانوں کو نشایا بنایا جاتا رہا ہے اور فوجی کارروائی میں بھی بہت سے لوگ مارے گئے ہیں۔
| 
باجوڑ: قبائل اور حکومت میں معاہدہ
