عدنان عادل، ریاض سہیل بی بی سی اردو ڈاٹ کام لاہور، کراچی

	کراچی کی الیکٹرانک مارکیٹ

کراچی میں ہونے والے دھماکے کے سوگ میں ہڑتال کی کال جماعت اسلامی سے وابستہ تاجر تنظیم انجمن تاجران لاہور اور حکومت سے وابستہ قومی تاجر محاذ نے دی تھی۔ اندرون شہر، برانڈرتھ روڈ، انارکلی، دی مال، ہال روڈ، اعظم مارکٹ، شاہ عالم مارکیٹ، جیل روڈ اور گلبرگ میں دکانیں نہیں کھولی گئیں۔

کراچی میں فوج، تصاویر میں

کراچی میں فوج طلب کر لی گئی

ادھر کراچی میں اکثر علاقوں میں پبلک ٹرانسپورٹ کی آمد و رفت معطل ہے۔ سہراب گوٹھ پر ہنگامہ آرائی اور پتھراؤ کے بعد سپر ہائی وے سے اندرون ملک جانے والی اور کراچی آنے والی ٹریفک بھی کم ہے۔ ایم اے جناح روڈ اور بوہرہ پیر اور رسالا کے علاقوں میں چھ گاڑیوں کو نذر آتش کردیا گیا ہے۔

کراچی میں منگل کو عید میلادالنبی کے ایک جلسہ میں بم پھٹنے سے سینتالیس افراد ہلاک اور درجنوں زخمی ہوگئے تھے۔

	ایم اے جناح روڈ، کراچی

نشتر پارک میں جلسہ کی منتظم سنی تحریک نے گزشتہ روز حکومت سے مطالبہ کیا تھا کہ وہ اڑتالیس گھنٹوں میں بم دھماکے کے ذمہ داروں کو گرفتار کرے۔ سنی تحریک کاکہنا ہے کہ بم دھماکہ کا مقصد اس کے قائدین کو ختم کرنا تھا۔

سنی تحریک کے شاہد غوری کے مطابق ان کی جماعت کے رہنماؤں کو گزشتہ دو ماہ سے جان کی دھمکیاں مل رہی تھیں اور انہوں نے اس بارے میں حکام کو آگاہ کیا تھا لیکن انہیں کوئی تحفظ فراہم نہیں کیا گیا۔

مختلف اہل سنت جماعتوں نے جمعہ کے دن پورے ملک میں پر امن ہڑتال کی کال دی ہے۔ متحدہ مجلس عمل نے بھی اس روز احتجاج کرنے کا اعلان کیا ہے۔ لاہور میں مرکزی شیعہ مدرسہ جامعۃ المنتظر نے بھی مدارس کے باہر اس واقعہ کے خلاف احتجاج کا اعلان کیا ہے۔