ریاض سہیل بی بی سی اردو ڈاٹ کام

	فوج کو حساس مقامات پر تعینات کیا جا رہا ہے

فوج کے تعلقاتِ عامہ کے شعبے کے ترجمان کرنل ادریس کے مطابق صوبائی حکومت نے شہر میں امن کی بحالی کے لیئے فوج سے مدد کی درخواست کی تھی۔

ان کا کہنا تھا کہ’ ملیر کینٹ سے نکلتے فوجی دستوں کو تین چار گھنٹے لگ جاتے ہیں، اس لیئے پہلے ان کو حساس مقامات پر تعینات کیا جا رہا ہے‘۔

حساس مقامات کی نشاندہی صوبائی حکومت نے کی ہے۔ تاہم فوری طور پر یہ معلوم نہیں ہو سکا کہ فوج کی کتنی تعداد کو شہر میں تعینات کیا گیا ہے۔

ادھر دھماکے کے تیسرے دن بھی شہر میں کاروبار زندگی معطل ہے۔ شہر کے
اہم تجارتی مرکز اور بازار بند ہیں اور اکثر علاقوں میں پبلک ٹرانسپورٹ کی آمد رفت معطل ہے۔

سہراب گوٹھ پر ہنگامہ آرائی اور پتھراؤ کے بعد سپر ہائی وے سے اندرون ملک جانے والی اور کراچی آنے والی ٹریفک بھی کم ہے جبکہ ایم اے جناح روڈ اور بوہرہ پیر اور رسالا کے علاقوں میں چھ گاڑیوں کو نذر آتش کردیا گیا ہے۔

یاد رہے کہ بدھ کی شام کراچی میں عیدِ میلاد النبی کے ایک بڑے اجتماع میں بم دھماکے سے سینتالیس افراد ہلاک اور اکاسی زخمی ہوگئے تھے۔ اس دھماکے میں سنی تحریک کی مرکزی قیادت مکمل طور پر ماری گئی تھی۔