اعجاز مہر بی بی سی اردو ڈاٹ کام، اسلام آباد

	آبی ذخائر کی اہمیت کے ذکر کے ساتھ ساتھ ان کی تعمیر پر اعتراضات بھی اٹھائے جاتے ہیں

ایوان صدر کے ترجمان کرنل حسن نے بتایا کہ یہ تقریب موسم کی خرابی کی وجہ سے کچھ روز کے لیے ملتوی کی گئی ہے اور سنگ بنیاد رکھنے کی نئی تاریخ کا اعلان جلد کیا جائے گا۔

واضح رہے کہ مقامی لوگ کہتے ہیں کہ اس ڈیم میں زیادہ تر اراضی شمالی علاقہ جات کی آئے گی جبکہ صوبہ سرحد کا بہت کم علاقہ اس میں آتا ہے اس لیے اس کا تعین ہونا چاہیے کہ متاثرہ افراد کو کیا ملے گا اور شمالی علاقہ جات کو رائلٹی کتنی اور کیسے ملے گی۔

بھارت نے بھی اس ڈیم کے بارے میں یہ اعتراضات اٹھائے ہیں کہ شمالی علاقہ جات کی حیثیت متنازعہ ہے اور متعلقہ علاقہ اس کا حصہ ہے۔ ان کے اس دعوے کو پاکستان نے سختی سے مسترد کردیا ہے۔

مخالفت کے باوجود صدرِ مملکت نے اس ڈیم کا سنگ بنیاد رکھنے کا اعلان کیا تھا لیکن عین وقت پر پروگرام ملتوی کردیا۔

اس مجوزہ ڈیم کی مخالفت کرنے والے لوگوں کو انتظامیہ نے بدھ کے روز گرفتار کرلیا تھا جبکہ انہیں اس علاقے میں جانے سے بھی روک دیا تھا۔

شمالی علاقہ جات کے لوگ کہتے ہیں کہ آج تک انہیں پاکستانی تسلیم نہیں کیا گیا اور عدالتی حکم کے باوجود ان کی شہری حیثیت کا تعین نہیں ہوا تو کل اس ڈیم سے متاثرہ بتیس گاؤں اور چالیس ہزار کے قریب آبادی کا کیا بنے گا۔

یاد رہے کہ صدر جنرل پرویز مشرف نے چند ماہ قبل صوبہ پنجاب کے ضلع میانوالی میں کالا باغ ڈیم کی صوبہ سندھ اور سرحد کی جانب سے شدید مخالفت کے بعد تعمیر ملتوی کرتے ہوئے پہلے بھاشا ڈیم تعمیر کرنے کا اعلان کیا تھا۔