ذوالفقار علی بی بی سی اردو ڈاٹ کام ، مظفرآباد

	مظفرآباد میں اس وقت لگ بھگ ستر خیمہ بستیاں ہیں

مظفرآباد میں جس خیمہ بستی میں آگ لگنے کا واقعہ پیش آیا وہ دریائے نیلم کے کنارے پر واقع ہے۔ یہ بستی کوئی 80 خیموں پر مشتمل ہے اور ان میں پانچ سو سے زائد افراد رہتے ہیں۔ اس خیمہ بستی کو کشمیر کے اس علاقے کی جماعت اسلامی کا رفاہی ادارہ چلارہا ہے۔

مظفرآباد میں اس وقت لگ بھگ ستر خیمہ بستیاں ہیں جہاں تقریباً سڑسٹھ ہزار لوگ آباد ہیں۔

الخدمت کے زیر اہتمام چلنے والی اس خیمہ بستی کے مکینوں کا کہنا ہے کہ اس بستی کے ایک خیمے نے آگ پکڑ لی اور دیکھتے ہی دیکھتے دس خیمے اس کی لپیٹ میں آگئے۔ ان کا کہنا ہے کہ اس خیمہ بستی کے مکینوں اور الخدمت کے لوگوں نے مل کر آگ پر قابو پالیا۔

اس خیمہ بستی کے مکینوں کا کہنا ہے کہ آگ بجلی کی شارٹ سرکٹنگ کی وجہ سے لگی۔ مکینوں کا کہنا ہے کہ اس واقعہ میں کوئی جانی نقصان نہیں ہوا البتہ ان خیموں میں لوگوں کی تمام اشیا جل کر راکھ ہوگئیں۔

زلزے کے بعد خمیوں میں آگ لگنے کا یہ پہلا واقعہ نہیں ہے اس سے پہلے بھی اس طرح کے کئی واقعات ہو چکے ہیں اور کچھ واقعات میں ہلاکتیں بھی ہوئیں اور اب تک ان واقعات میں کوئی دو درجن افراد ہلاک ہوچکے ہیں۔ متاثرہ علاقوں میں بہت سارے لوگ خیمہ بستیوں میں رہتے ہیں۔ ان خیمہ بستیوں میں حفاظت کا معقول انتظام نہیں ہے جس کی وجہ سے یہاں آگ لگنے کے واقعات رونما ہوتے رہتے ہیں۔