ہارون رشید بی بی سی اردو ڈاٹ کام، پشاور

	امریکی صدر جارج بش کے دورہ کے بعد کارروائیوں میں اضافہ ہو گیا ہے۔

پاکستانی فوج کے ترجمان میجر جنرل شوکت سلطان نے دعویٰ کیا ہے کہ ہلاک ہونے والوں میں غیر ملکی شدت پسند اور ان کے مقامی حمایتی شامل ہیں۔ تاہم ابھی تک آزاد ذرائع سے ان کے اس دعوے کی تصدیق نہیں ہو سکی۔

میجر جنرل شوکت سلطان نے بی بی سی کو بتایا کہ کارروائی جمعہ کی شب آٹھ اور نو بجے کے درمیان کی گئی۔

وزیرستان کی صورت حال پر خصوصی ضمیمہ

میران شاہ کی تازہ صورت حال کی تصویری جھلکیاں

ایک سوال کے جواب میں کہ آیا ہلاک ہونے والوں کی لاشیں حکومت کے قبضے میں اور ان کا غیر ملکی ہونا کیسے ثابت ہوگا، فوج کے ترجمان نے کہا کہ لاشیں ابھی حکام کے پاس نہیں ہیں لیکن کارروائی مصدقہ اطلاعات پر کی گئی ہے۔

فوج کے ترجمان کے مطابق حملے میں گن شپ ہیلی کاپٹروں کا استعمال کیا گیا۔

اس سے قبل جمعہ کے روز میران شاہ میں چھ روز کے بعد کرفیو میں چار گھنٹے کی نرمی کی گئی تھی اور کھجوری اور ایشا چیک پوسٹوں کو آمد ورفت کے لیے چار گھنٹے کے لیے کھولا گیا۔

	میرن شاہ میں حالیہ جھڑپوں میں ڈیرہ سو لوگ ہلاک ہو چکے ہیں۔

جمعہ کی دوپہر میران شاہ کے قریب ایک زور دار دھماکے سے پورا علاقے دہل گیا تاہم اس دھماکے کی کوئی تفیصل معلوم نہیں ہو سکی۔

علاقے کے پولیٹکل ایجنٹ ظہیر السلام نے بتایا کہ کرفیو میں چار گھنٹے کی نرمی کی گئی تھی تاکہ لوگ اشیاء خوردنوش حاصل کر سکیں۔ انہوں نے کہا کہ اس کے بعد شہر میں دوبارہ کرفیو لگا دیا گیا ہے۔

کرفیو میں نرمی کے باوجود میران شاہ کی فضا میں فوجی ہیلی کاپٹر گشت کر رہے تھے اور علاقے میں کشیدگی پائی جاتی تھی۔ شہر میں کسی غیر مقامی کے بغیر اجازت داخل ہونے پر غیر اعلانیہ پابندی عائد ہے۔

کھجوری اور ایشا چیک پوسٹ کے کھل جانے کے بعد بہت سے لوگ رزمک سید زئی اور دوسرے ملحقہ علاقوں سے نقل مکانی کرکے بنوں پہنچتے رہے۔

	میران شاہ سکیورٹی فورسز کے گھیرے میں ہے

میران شاہ کے قریب میر علی کے قصبے میں بازار کھل گئے ہیں اور بظاہر زندگی معمول کی طرف لوٹتی دکھائی دی۔