ہارون رشید بی بی سی اردو ڈاٹ کام، میران شاہ

	میران شاہ میں جھڑپوں میں بھاری ہتھیار استعمال کیے گئے

پاکستان کے قبائلی علاقے شمالی وزیرستان کے صدر مقام میران شاہ میں بدھ کے روز بھی کرفیو برقرار رہا جبکہ کشیدگی میں بھی کسی کمی کے آثار نہیں ہیں۔ تاہم کسی تازہ ناخوشگوار واقعے کی اطلاع نہیں ملی ہے۔

ہمارے نامہ نگار ہارون نے میران شاہ میں کیا دیکھا

میران شاہ میں کرفیو

میران شاہ سے لوگوں کی نقل مکانی

میران شاہ سے موصول اطلاعات کے مطابق شہر میں فوج کا گشت جاری ہے تاہم شہر میں کئی روز گزر جانے کے باجود ابھی تک بجلی بحال نہیں کی جاسکی ہے۔ اس وجہ سے ٹیوب ویل بند ہیں اور قبائلوں کو پانی کی کمی کا مسئلہ درپیش ہے۔ بازار بند ہونے کی وجہ سے دیگر اشیاء ضرورت کی کمی ہے۔

نامعلوم افراد نے میران شاہ اور میر علی کے درمیان نورک کے مقام پر منگل کی شام پولیٹکل ایجنٹ سید ظہیر الاسلام کی گاڑی پر حملہ کی تفتیش کے سلسلے میں بدھ کے روز حکام نے تین قبیلوں کو علاقائی ذمہ داری کے قانون کے تحت نوٹس جاری کیئے ہیں۔

	شہر محاصرے میں ہے اور بہت سے لوگ شہر سے جاچکے ہیں

اس حملے میں پولیٹکل ایجنٹ کا ایک محافظ ہلاک جبکہ دو زخمی ہوئے تھے۔ سرکاری ذرائع کے مطابق ان قبیلوں میں مبارک شاہی، حکیم خیل اور مرسی خیل شامل ہیں۔

ادھر پشاور میں بدھ کو وزیرستان سٹوڈنٹس فیڈریشن، خیبر سٹوڈنٹس آرگنائزیشن اور فاٹا لائیرز فورم نے میران شاہ میں جاری فوجی کارروائی کے خلاف احتجاج کیا ہے۔

پشاور پریس کلب کے سامنے مظاہرے کے دوران طلبہ کے بقول بےگناہ قبائلوں کا قتل عام بند کرنے، طلبہ کو بندوق اٹھانے پر مجبور نہ کرنے اور ذرائع ابلاغ کو علاقے میں محفوظ رسائی دینے جیسے مطالبات کیئے۔

میران شاہ میں تو مقامی طالبان کو نہیں دیکھا اور نہ کسی سے بات ہوئی لیکن واپسی کے سفر کے دوران عیدک کے مقام پر سڑک کنارے اسی قسم کے لوگ دیکھے جو کبھی قندہار میں دیکھا کرتے تھے

طلبہ نے امریکی صدر بش کے خلاف بھی نعرہ بازی کی۔ مقررین نے دعویٰ کیا کہ گزشتہ دنوں فوجی آپریشن میں ہلاک ہونے والوں میں اکثریت عام لوگوں کی تھی۔

انہوں نے شکایت کی کہ اعلی عدالتیں پتنگ بازی اور شادی میں کھانوں کا نوٹس تو لے رہی ہیں لیکن وزیرستان میں جاری ہلاکتیں ان کو نظر نہیں آ رہی ہیں۔ انہوں نے اس مسئلہ کے حل کے لیئے پارلیمانی اور عدالتی کمیشن کے قیام کا مطالبہ بھی کیا۔

ان طلبہ اور وکلا تنظیموں نے اپنا احتجاج جاری رکھنے کا اعلان بھی کیا۔

	شہر میں افغانستان سے لائی جانے والی گاڑیوں کا کاروبار ہوتا ہے۔ لڑائی سے بہت سے گاڑیاں تباہ ہو گئی ہیں

ادھر مسئلے کا بات چیت کے ذریعے حل تلاش کرنے کی کوششیں بھی جاری ہیں۔ اس سلسلے میں کل رات گئے شمالی وزیرستان کے قبائلی عمائدین کے ایک وفد نے گورنر سرحد خلیل الرحمان سے ملاقات کی جبکہ بدھ کو اس وفد نے اسلام آباد میں صدر جنرل پرویز مشرف سے بھی بات کی ہے۔

ایک سرکاری بیان کے مطابق قبائلوں نے حکومت سے جرگے کو اپنا روایتی کرداد ادا کرنے کے لئے موقعہ فراہم کرنے کا مطالبہ کیا۔ تاہم صدر سے ملاقات میں کسی جنگ بندی، کرفیو میں نرمی یا امن معاہدے کے سلسلے میں پیش رفت کے آثار دیکھائی نہیں دے رہے ہیں۔

میران شاہ میں مقامی طالبان نے قبائلی سرداروں پر حکومت سے ملنے پر پابندی لگا رکھی تھی۔ اس وجہ سے یہ واضح نہیں ہو سکا ہے کہ حکومت سے مذاکرات کرنے والے اس قبائلی وفد کو مقامی طالبان کی حمایت حاصل ہے یا نہیں۔