تازہ کارروائی کی وجہ سے فوج کے خلاف اشتعال بڑھ گیا ہے اور صورتِ حال مزید نازک ہوگئی ہے

دریں اثناء میران شاہ سے رکن قومی اسمبلی نیک زمان نے گورنر سرحد سے ملاقات کی ہے اور جرگہ بلانے کی تجویز پیش کی۔ ان کا تعلق جمعیت علمائے اسلام سے ہے جو سرحد حکومت کا حصہ ہے۔

شہریوں کی تکلیف  علاقے میں پانی، بجلی اور سڑکیں بند ہیں جس سے خواتین اور بچوں کو تکلیف کا سامناہے رکن قومی اسمبلی نیک زمان

انہوں نے کہا کہ علاقے میں پانی، بجلی اور سڑکیں بند ہیں جس سے خواتین اور بچوں کو تکلیف کا سامناہے۔

بی بی سی کے نامہ نگار ہارون رشید نے پیر کی صبح بتایا کہ علاقے سے جھڑپوں کی اطلاعات ملی ہیں لیکن وہ سنیچر کی رات کی طرح شدید نہیں تھیں۔

نقل مکانی  لڑائی میں گاؤں کے لوگ زیادہ متاثر ہوئے ہیں، میران شاہ سےگاڑی نہیں آنے دی جا رہی اور پچیس تیس ہزار لوگ پیدل سفر کر کے علاقے سے نکل رہے ہیں ایک شہری

میران شاہ سے آنے والے ایک شخص نے پیر کو بتایا کہ لڑائی میں گاؤں کے لوگ زیادہ متاثر ہوئے ہیں۔ انہوں نے کہا کہ میران شاہ سے گاڑی نہیں آنے دی جا رہی۔ انہوں نے کہا کہ پچیس تیس ہزار لوگ پیدل سفر کر کے علاقے سے نکل رہے ہیں۔

انہوں نے کہا کہ متاثرہ علاقے سے آنے والے لوگوں نے انہیں راستے میں بتایا بازاروں میں لاشیں پڑی ہیں اور بہت نقصان ہوا ہے۔

محفوظ مقامات کی طرف بھاگنے والے دیہاتی جن میں عورتیں اور بچے بھی شامل ہیں، پیدل ہی اس علاقے کو چھوڑ رہے ہیں جہاں ہفتے کو شروع ہونے والی بدترین لڑائی میں پینتالیس شدت پسند اور پانچ سکیورٹی اہلکار مارے گئے تھے۔

تازہ رپورٹ: پانچ فوجی، چھیالس ’شرپسند‘ ہلاک

خبررساں ادارے اے پی کے مطابق اتوار کو علاقہ چھوڑنے والوں نے ہاتھوں میں سوٹ کیس اور کپڑوں کی گٹھریاں اٹھائی ہوئی تھیں اور وہ پیدل چل رہے تھے کیونکہ علاقے میں ٹرانسپورٹ کو آنے جانے کی اجازت نہیں۔

پچیس سالہ نور نواز نے جو علاقے میں گاڑیوں کے پرزوں کا کاروبار کرتے ہیں، اے پی کو بتایا کہ ان کا پورا خاندان ہفتے کی رات سو نہیں سکا کیونکہ علاقے میں شدید لڑائی جاری تھی۔

میران شاہ میں رات بھر کیا ہوا تمام رات مارٹر کے گولوں اور توپ خانے کی آوازیں گونجتی رہیں اور اتوار کی صبح تک ہیلی کاپٹر فضا میں پرواز کرتے رہے۔لوگ انتہائی خوفزدہ ہیں۔ یہاں کوئی سو نہیں سکا۔ بچے رات بھر روتے رہے ایک عینی شاہد

گزشتہ روز سے اب تک ان جھڑپوں میں فوجی ذرائع کے مطابق پینتالیس افراد مارے جا چکے ہیں جن میں غیر ملکی شدت پسند بھی شامل ہیں۔

تاہم شدت پسندوں کے طرف دار قبائلیوں کا دعویٰ ہے کہ جھڑپوں میں مقامی لوگ مارے گئے ہیں اور فوجی کارروائی سے حکومت کے خلاف اشتعال اور بڑھ گیا ہے جس سے علاقے کی صورتِ حال مزید نازک ہوگئی ہے۔

	فوج نے ابھی تک کسی عام فرد کے مرنے کی تصدیق نہیں کی