ہارون رشید بی بی سی اردو ڈاٹ کام، پشاور

	’آل فاٹا کونسلرز الائنس‘ کا کہنا ہے کہ انہیں اختیارات نہیں ملے (فائل فوٹو)

صوبائی دارالحکومت پشاور میں ایک اخباری کانفرنس میں آل فاٹا کونسلرز الائنس کے عہدیداروں نے اس بات پر افسوس کیا کہ ڈیڑھ برس گزر جانے کے باوجود انہیں ابھی تک نہ کوئی اختیار ملا ہے، نہ ان سے مشاورت کی گئی ہے۔

صدر پرویز مشرف کے قبائلی علاقوں میں اصلاحات کے اپنے منصوبے کے تحت سنہ دو ہزار چار میں ایجنسی کونسلوں کے قیام کے لیئے چار سو پچاس کونسلروں کا انتخاب عمل میں آیا تھا۔

ان کونسلوں کے قیام کا مقصدمقامی قبائلیوں کو علاقے کے ترقیاتی منصوبوں میں ساتھ لے کر چلنا تھا۔ لیکن اس انتخاب کے بعد سے اب تک یہ کونسلر بے کار بیٹھے ہیں۔ ان کا کہنا ہے کہ ابھی تک ان کے منتخب ہونے کا نوٹفیکیشن بھی جاری نہیں کیا جا سکا ہے۔

آل فاٹا کونسلرز الائنس کے چیرمین عمل جان محسود اور دیگر رہنماؤں نے الزام لگایا کہ نوکر شاہی انہیں اختیارات کی منتقلی کی سب سے بڑی روکاوٹ ہیں۔ اس کے علاوہ انہوں نے موجودہ گورنر خلیل الرحمان کو بھی اس تاخیر کا برابر ذمہ دار قرار دیا۔

قبائلی کونسلروں کا کہنا تھا کہ وہ صدر پرویز مشرف سے ملاقات کے لیئے دو مرتبہ اسلام آباد جا چکے ہیں لیکن انہیں ملنے نہیں دیا گیا۔ انہوں نے مستعفی ہونے کی بھی دھمکی دی ہے لیکن اس بارے میں وقت کا تعین انہوں نے نہیں کیا۔