ندیم سعید بی بی سی اردو ڈاٹ کام، ملتان

	گزشتہ روز کراچی میں متنازع کارٹون کے معاملے ہونے والا مظاہرہ تشدد کا شکار ہو گیا۔

احتجاجی مظاہرے کا اہتمام جماعت اسلامی پاکستان کی نوجوانوں پر مشتمل ذیلی تنظیم شباب ملی نے کیا تھا۔ پولیس نے مظاہروں پر لگی پابندی کی خلاف ورزی کرنے پر شباب ملی کے چونتیس کارکنوں کو جمعہ کے روز گرفتار بھی کر لیا تھا۔

شباب ملی کے سو کے قریب کارکن ملتان کے گورنمنٹ ولایت حسین کالج سے احتجاج کا آغاز کرتے ہوئے شہر کے مصروف کاروباری علاقے حسین آگاہی بازار کی طرف جانا چاہتے تھے کہ پولیس نے انہیں راستے میں آنے والے علی چوک پر روک کر منتشر کرنے کی کوشش کی لیکن مظاہرین آگے بڑھنے پر بضد تھے۔

جس پر پولیس کی بھاری نفری نے پچاس کے قریب مظاہرین کو حراست میں لے لیا۔ اس موقع پر پولیس کی طرف سے معمولی لاٹھی چارج بھی کیا گیا۔ پولیس حکام کا دعویٰ ہے کہ حراست میں لیئے گئے مظاہرین میں سے سولہ کو تنبیہ کر کے چھوڑ دیا گیا تھا جبکہ باقی چونتیس کے خلاف انیس سو ستانوے کے انسداد دہشت گردی ایکٹ کی دفعہ سات کے تحت تھانہ لوہاری گیٹ میں مقدمہ درج کر لیا گیا ہے۔

اس کے علاوہ مظاہرین کے خلاف نقص امن اور حملہ کرنے کی نیت سے غیر قانونی اکٹھ کرنے کے الزامات سے متعلقہ دفعات بھی مقدمے میں شامل کی گئی ہیں۔ گرفتار افراد میں شباب ملی کے ضلعی صدر شہزادہ بابر مان بھی شامل ہیں۔