اعجاز مہر بی بی سی اردو ڈاٹ کام، اسلام آباد

	پاکستان میں پیغمبر اسلام کے کارٹون چھاپنے پر سخت غم و غصہ پایا جاتا ہے۔

یہ بات انہوں نے جمعہ کے روز پارلیمان کے ایوان بالا یعنی سینیٹ میں وقفہ سوالات کے دوران کہی۔

حکومتی سینیٹر کامل علی آغا کے ضمنی سوال کے جواب میں انہوں نے کہا کہ توہین آمیز کارٹون کی اشاعت سے مسلمانوں کے جذبات مجروح ہوئے ہیں۔

انہوں نے مختلف سوالات کے جواب میں ایوان کو بتایا کہ اسی فیصد ادویات پاکستان میں ہی تیار ہوتی ہیں اور بیس فیصد دوائیں باہر سے منگوائی جاتی ہیں۔

وفاقی وزیر صحت نے ایوان کو بتایا کہ گزشتہ دو برسوں میں دنیا کے پینتالیس ممالک سے تیس کروڑ پینتاللیس لاکھ ڈالر کی ادویات درآمد کی گئی ہیں۔

واضح رہے کہ ڈنمارک، فرانس، امریکہ اور دیگر ممالک کے مختلف اخبارات اور ویب سائیٹ پیغمبر اسلام کے متعلق مختلف کارٹون شایع کرچکے ہیں۔ ان کارٹونز کی اشاعت کے خلاف مسلمان ممالک کے اندر شدید غم و غصہ پایا جاتا ہے اور تاحال پرتشدد احتجاجی مظاہروں میں کچھ لوگ مارے بھی جاچکے ہیں۔

پاکستان حکومت نے متعلقہ ممالک سے جان بچانے والی ادویات منگوانے پر تو پابندی عائد کردی ہے لیکن دوسری اشیاء کے کاروبار پر پابندی کا کوئی اعلان نہیں کیا۔

سینیٹ میں دیگر سوالات کے جواب میں وزیر صحت نے بتایا کہ تریپن فیصد ادویات کی قیمتیں پاکستان میں بھارت کی نسبت سستی ہیں۔

ایک سوال پر انہوں نے ایوان کو بتایا کہ آئندہ اپریل سے خارج المدت ادویات بیچنے کے خلاف ملک بھر میں ایک مہم شروع کی جائے گی ۔ ان کے مطابق مدہ خارج دوائیں بیچنے والوں کے خلاف سخت کارروائی ہوگی۔

سینیٹ کے اجلاس میں حزب اختلاف کے اراکین نے کوئٹہ میں محمود خان اچکزئی کی رہائش گاہ سے ان کے تین محافظ اغوا کرنے کا معاملہ اٹھایا۔ جس پر وزیر مملکت برائے پیٹرولیم محمد نصیر مینگل نے کہا کہ انہیں کسی سرکاری ایجنسی نے نہیں بلکہ قبائلی دشمنی کی وجہ سے اغوا کیا گیا ہے۔

سینیٹ میں چینی کی قیمتوں میں اضافے کے خلاف بھی حزب مخالف نے احتجاج کیا اور حکومت پر قیمتوں پر ضابطہ لانے میں ناکامی کے الزامات لگائے۔

وزیر مملک برائے خوراک محمد علی ملکانی نے ایوان کو بتایا کہ حکومت نے اس بارے میں ایک کمیٹی بنادی ہے جس میں تمام متعلقہ فریقین کو نمائندگی حاصل ہے۔ ان کے مطابق یہ کمیٹی ملک میں چینی کی پیداوار بڑھانے کے لیے ایک حکمت عملی وضح کرے گی۔