عزیز اللہ خان بی بی سی اردو ڈاٹ کام، کوئٹہ

	مظاہرے میں زیادہ تر پرچم جمہوری وطن پارٹی کے تھے

کوئٹہ پریس کلب کے سامنے قوم پرست جماعت کے پرچم اور پلے کارڈز اٹھائے مظاہرین فوجی آپریشن اور بلوچوں پر بمباری بند کرنے کا مطالبہ کر رہے تھے۔ اس مظاہرے میں زیادہ تر پرچم جمہوری وطن پارٹی کے تھے جن کے لیڈر آغا شاہد بگٹی اور ہمایوں مری اس مظاہرے کی قیادت کر رہے تھے۔

آغا شاہد بگٹی نے بی بی سی کو بتایا ہے کہ ڈیرہ بگٹی میں فرنٹیئر کور نے بلا اشتعال بھاری اسلحے سے فائرنگ کی ہے اور گولے پھینکے ہیں۔ ان سے جب پوچھا گیا کہ کیا بگٹی قبائل کے لوگوں نے سرکاری عمارتوں پر مورچے قائم کیے ہوئے ہیں تو انھوں نے کہا کہ یہ سراسر جھوٹ ہے۔ ’ایف سی کے حکام بہانے ڈھونڈ رہے ہیں کہ کس طرح بے گناہ اور معصوم شہریوں پر گولے برسائے جائیں۔‘

بلوچ قوم پرست جماعتوں کے علاوہ اپنے آپ کو محکوم کہلوانے والی جماعتوں کا اتحاد پونم، اتحاد برائے بحالی جمہوریت اور عوامی نیشنل پارٹی نے احتجاجی مہم کا اعلان پہلے سے کر رکھا ہے۔

دو جنوری کو اسلام آباد میں پارلیمنٹ کے سامنے مظاہرے میں بلوچستان کے پارلیمانی ارکان شرکت کریں گے، جبکہ پانچ جنوری کو بلوچستان اسمبلی اور آٹھ جنوری کو بلوچستان کی تمام ضلعی اسمبلیوں کے سامنے مظاہرے کیے جائیں گے۔