ہارون رشید بی بی سی اردو ڈاٹ کام، پشاور

	وانا کے تحصیلدار محمد وصال کی گاڑی میں نامعلوم افراد نے بم نصب کیا تھا

ادھر شمالی وزیرستان میں لاپتہ صحافی کے قبیلے نے حکومت کو اس کی بازیابی کے لیے چوبیس گھنٹوں کی مہلت دی ہے۔

ڈیرہ اسماعیل خان پولیس کے مطابق وانا کے تحصیلدار محمد وصال کی گاڑی میں نامعلوم افراد نے بم نصب کیا تھا جو آج صبح ہمت علاقے سے ڈیرہ بازار آتے ہوئے راستے میں پھٹ گیا۔ دھماکے سے گاڑی بری طرح تباہ ہوگئی البتہ تحصیلدار کو معمولی چوٹیں آئیں۔

اس واقعہ کے بعد پولیس نے چند افراد کو شک کی بنیاد پر حراست میں لیا ہے۔ ان میں وہ لوگ بھی شامل ہیں جن کے مکان میں تحصیلدار نے کل رات بطور مہمان گزاری تھی۔

ادھر شمالی وزیرستان میں میر علی میں حرمز قبیلے کے جرگے نے حکومت کو صحافی حیات اللہ خان کی بازیابی کے لیے چوبیس گھنٹوں کی مہلت دی ہے۔

قبیلے کا کہنا ہے کہ تین ہفتوں سے لاپتہ صحافی کے بازیاب نہ ہونے کی صورت میں وہ احتجاجی راستہ اپنائے گا جس دوران کسی ناخوشگوار صورتحال کی تمام تر ذمہ داری حکومت پر ہوگی۔

جرگے میں مولانا عجب خان، ملک جان بہار اور ملک احسان ولی سمیت کئی عمائدین نے شرکت کی۔ حرمز حیات اللہ کا اپنا قبیلہ ہے۔

ایک انگریزی اخبار ’دی نیشن’ اور بین الاقوامی خبر رساں ادارے کے لئے کام کرنے والی شمالی وزیرستان کے صحافی حیات اللہ خان کو پانچ دسمبر کو میر علی بازار سے نامعلوم نقاب پوش افراد نے اغوا کر لیا تھا۔ تاہم یہ کون لوگ تھے تین ہفتے گزر جانے کے باوجود معلوم نہیں ہوسکا ہے۔