اعجاز مہر بی بی سی اردو ڈاٹ کام، اسلام آْباد

	حکومت پارلیمان کو اختیار نہیں دینا چاہتی: اپوزیشن

یہ فیصلہ منگل کے روز حزب مخالف کی تمام جماعتوں کے سرکردہ رہنماؤں کے اجلاس میں کیا گیا۔ جس کا اعلان قومی اسمبلی میں قائد حزب اختلاف مولانا فضل الرحمٰن، مخدوم امین فہیم اور دیگر رہنماؤں نے ایک پریس کانفرنس میں کیا۔

چودھری نثار علی خان اور دیگر رہنماؤں نے کہا کہ زلزلے سے متاثرہ افراد اور علاقوں کی بحالی کے لیے بنائے گئے دونوں اداروں کے سربراہان حاضر سروس فوجی ہیں اور وہ پارلیمان کو جوابدہ نہیں۔ ایسی صورتحال میں وہ پارلیمانی کمیٹی میں شامل نہیں ہوسکتے۔

حزب اختلاف کے رہنماؤں نے کہا کہ حکومت پارلیمان کو اختیار نہیں دینا چاہتی اور نہ ہی شہری بالادستی تسلیم کرتی ہے۔

مولانا فضل الرحمن نے کہا کہ زلزلہ ایک قدرتی آفت تھی جس سے ہونے والی تباہی سے نمٹنے کے لیے حزب اختلاف نے سنجیدگی کے ساتھ حکومت کو تعاون کی پیشکش کی۔

ان کے مطابق حزب اختلاف کی جانب سے ظاہر کردہ اظہار یکجہتی کا حکومت نے سنجیدگی کے ساتھ جواب نہیں دیا اس لیے وہ پارلیمانی کمیٹی میں شامل نہیں ہوں گے۔

مولانا فضل الرحمٰن نے کہا کہ حکومت نے ایسی نازک صورتحال میں تین صوبوں کی جانب سے مسترد کیے جانے والے متنازعہ کالا باغ ڈیم کا معاملہ چھیڑ دیا ہے۔ جو ان کی نظر میں ملکی سلامتی کے لیے ایک بڑا سوالیہ نشان ہے۔

حزب اختلاف کے رہنماؤں نے بلوچستان میں فوجی آپریشن کی مذمت کی اور کہا کہ حکومت زلزلے سے متاثرہ علاقوں میں امدادی کاموں کے بجائے ہیلی کاپٹر بلوچستان میں عوام کے خلاف استعمال کر رہی ہے۔

واضح رہے کہ زلزلے سے ہونے والی تباہی سے نمٹنے اور تعمیر نو کے لیے ملنے والی اربوں ڈالر کی امداد درست طریقے سے استعمال کرنے کے لیے حزب اختلاف نے پارلیمانی کمیٹی بنانے کا مطالبہ کیا تھا۔ جس کی بعض امدادی اداروں نے بھی حمایت کی تھی۔