عزیز اللہ خان بی بی سی ادو ڈاٹ کام، کوئٹہ

	آفتاب احمد خان شیر پاؤ نے بھی گزشتہ روز فوجی آپریشن کی تردید کی تھی

اخبارات میں بیانات جاری کرنے میں کافی متحرک وزراء نہ تو اس کارروائی کی کھل کر حمایت کرتے ہیں اور نہ ہی اس کے خلاف کوئی بات کرنا چاہتے ہیں۔

صوبائی وزیر داخلہ شعیب نوشیروانی سے اس سلسلے میں بارہا رابطے کی کوشش کی لیکن ان سے رابطہ نہ ہوسکا اور اگر ٹیلیفون سے رابطہ ہوا تو ٹیلیفون ہی بند کر دی گئی۔ اسی طرح صوبائی حکومت کے ترجمان رازق بگٹی سے رابطہ قائم کیا گیا تو انھوں نے کہا کہ ان کے پاس اس سلسلے میں کوئی معلومات نہیں ہیں کہ وہ ذرائع ابلاغ کو فراہم کر سکیں۔

مجلس عمل سے تعلق رکھنے والے وزراء بھی اس معاملے پر خاموش ہیں۔

صرف وزیر اعلی بلوچستان جام محمد یوسف نے آج ڈیرہ مراد جمالی میں صحافیوں سے باتیں کرتے ہوئے کہا ہے کہ کوئی فوجی آپریشن نہیں ہو رہا صرف ان لوگوں کے خلاف سرچ آپریشن ہو رہا ہے جو راکٹ باری اور بم دھماکوں میں ملوث رہے ہیں۔

اس سلسلے میں آج وفاقی وزیر داخلہ آفتاب احمد خان شیرپاؤ ایک ہنگامی دورے پر کوئٹہ آئے جہاں اطلاعات کے مطابق انھوں نے ایک اعلی سطحی اجلاس میں شرکت کی ہے لیکن انھوں نےذرائع ابلاغ سے کوئی بات نہیں کی۔

آفتاب احمد خان شیر پاؤ نے بھی گزشتہ روز فوجی آپریشن کی تردید کی تھی اور کہا تھا کہ مشتبہ افراد کے خلاف مقامی انتظامیہ شائد کوئی کارروائی کر رہی ہو گی جس کا انھیں علم نہیں ہے۔

لیکن فوج کے ترجمان میجر جنرل شوکت سلطان نے گزشتہ روز اسلام آباد میں کہا تھا کہ راکٹ باری اور بم دھماکوں میں ملوث مشتبہ افراد کے خلاف کوہلو میں کارروائی شروع کی گئی ہے۔