ہارون رشید بی بی سی اردو ڈاٹ کام، پشاور

	حکومت قبائلی علاقوں میں القاعدہ کے خلاف حمایت حاصل کرنے کی کوشش کر رہی ہے

مولانا عجب نور نے حکام کو یہ یقین دہانی سنیچر کے روز شمالی وزیرستان کے خیسور علاقے میں ایک مدرسے میں جرگے کے دوران کرائی۔

مولانا عجب نور علاقے کی روحانی شخصیت مولانا گل منیر کے صاحبزادے ہیں اور افغانستان میں روسی مداخلت کے خلاف مزاحمت کا وسیع تجربہ رکھتے ہیں۔

مقامی حکام کے مطابق یہ معاہدہ غیرمشروط تھا جس کے تحت مولانا عجب نور نے یقین دلایا ہے کہ وہ اپنے علاقے میں کسی غیرملکی کو پناہ نہیں دیں گے۔ اس موقعہ پر انہوں نے کہا کہ وہ حکومت سے بھی توقع کرتے ہیں کہ وہ کسی شک کی بنیاد پر علاقے میں فوجی کارروائی سے قبل علاقے کے علماء اور مشیران کو اعتماد میں لے گی۔

اس سے چند روز قبل میران شاہ میں اسی طرح کے ایک معاہدے کے تحت پینتیس مطلوب افراد نے حکومت کو تعاون کی یقین دہانی کرائی تھی۔

لیکن اس کے فورا بعد میرعلی میں غیر واضع حالات میں پانچ افراد کی ہلاکت سے ان معاہدوں کو دھچکا لگنے کا خطرہ پیدا ہوا ہے۔ مقامی قبائل حکومت پر طیاروں کے ذریعے اس مکان پر حملہ کرنے کا الزام لگاتے ہیں۔