پاکستان ایل او سی کے راستے جستی چادریں درآمد کرنا چاہتا ہے

اس مقصد کے لیے پاکستان کی وزارتِ تجارت نےایک نوٹیفیکیشن جاری کر دیا ہے جس کے مطابق بھارت سے نرم فولاد کی درآمد پر عائد پابندی اٹھا لی گئی ہے۔

اس سے پہلے بھارت سے فولاد اور اس کی مصنوعات درآمد کرنے پر مقامی صنعتوں کے مطالبے کے وجہ سے کڑی پابندی عائد تھی۔

اطلاعات کے مطابق حکام کا کہنا ہے کہ زلزلے سے اتنے بڑے پیمانے پر تباہی ہوئی ہے کہ سٹیل کی مقامی صنعت تعمیرِ نو کے لیے درکار فولاد کی ضرورت پوری نہیں کر سکتی۔

یہ بھی بتایا گیا ہے کہ بھارت سے نرم فولاد کی درآمد کا فیصلہ کم قیمت اور نقل و حمل کے کم اخراجات کی وجہ سےکیا گیا ہے۔ بھارت سے نرم فولاد کی درآمد کی اجازت کے ساتھ بھارت سے پاکستان کو درآمد کی جانے والی اشیاء کی تعداد 723 ہو گئی ہے۔

یاد رہے کہ پاکستانی صدر جنرل پرویز مشرف نے چند دن قبل ہی زلزلہ زدگان کے لیے بھارتی امداد کا شکریہ ادا کرتے ہوئےکہا تھا کہ پاکستان بھارت سے فولاد درآمد کر سکتا ہے۔

نقل وحمل کے اخراجات کم کرنے کے لیے پاکستان بھارت سے جستی چادروں جیسے تعمیراتی سامان کی درآمد کے لیے ایل او سی کے پانچ مقامات کو استعمال میں لانا چاہتا ہے۔