علی سلمان بی بی سی اردو ڈاٹ کام لاہور

	مشرقی ایشا میں برڈ فلو وائرس کا خوف طاری ہے

لاہور کے جنرل ہسپتال میں جمعہ اور سنیچر کی درمیانی رات ڈیرھ بجے اٹھارہ سالہ نوجوان علی شان دم توڑ گئے جو تین روز پہلے بیہوشی کے عالم میں ہپستال لائے گئے تھے۔

اکبری منڈی لاہور کے رہائشی علی شان کی بیماری کو ابتدائی طور پر کانگو وائرس سمجھا گیا۔

جنرل ہسپتال کے ڈاکٹروں اور عملے کو خصوصی لباس اور ماسک فراہم کیے گئے اور مریض کو الگ کمرے میں منتقل کر دیا گیا جبکہ مریض کی ہلاکت کے بعد اس کے بستر اور اس کے زیر استعمال تمام اشیاء کو جلا دیا گیا۔

سنیچر کی صبح اسلام آباد سے طبی ماہرین کی ٹیم نے ہسپتال کا دورہ کیا اور حفاظتی اقدمات کا جائزہ لیا جبکہ محکمۂ صحت کی اعلیٰ سطحی کمیٹی نے اپنے طور پر تحقیقات کیں محکمۂ صحت پنجاب کے ڈائریکٹر جنرل ڈاکٹر محمد اسلم چودھری نے کہا کہ اس کمیٹی نے اپنی رپورٹ میں قرار دیا ہے کہ علی شان کی ہلاکت کم از کم کانگو وائرس سے نہیں ہوئی لیکن وہ یہ نہیں بتا سکتے کہ علی شان کی موت کی کیا وجوہات تھیں۔

جنرل ہسپتال کے ڈاکٹر رضوان مسعود بٹ نے بی بی سی کو بتایا کہ مریض کے دماغ کی جھلی پر سوزش ان کی ہلاکت کا سبب بنی ہے۔

مئی سن دو ہزار چار میں بلوچستان میں چار افراد کی کانگو وائرس میں ہلاکت کے بعد گزشتہ مہینے کراچی میں بھی دو ڈاکٹر دماغی جھلی میں سوزش کے باعث ہلاک ہوگئے تھے۔ ان کے مرض کو بھی کانگو وائرس سے مشابہ قرار دیاگیا۔

ڈاکٹر رضوان مسعود بٹ نے کہا ہے کہ کل رات لاہور میں انتقال کرنے والے علی شان اگر کانگو وائرس کے مریض نہیں بھی تھے تو بھی ابھی تک یہ معلوم نہیں ہو سکا کہ ان پر کس قسم کے وائرس یا بیکٹریا نے حملہ کیا ہے۔

علی شان لاہور کی ایک گارمنٹس فیکٹری کے ملازم تھے اور ان کی لاش ان کے ورثا کے حوالے کرتے ہوئے ہسپتال کی انتظامیہ نے یہ بھی بتایا ہے کہ انہیں اس کی تدفین کے مراحل تک کیا احتیاطی تدابیر کر نی ہیں۔

خود جنرل ہسپتال کے ڈاکٹروں اور عملے نے اپنے وہ ماسک ،گاؤن اور کپڑے بھی تلف کر دیے ہیں جنہیں پہن کر وہ مریض کا معائنہ کرتے رہے ہیں۔