مبشر زیدی بی بی سی اردو ڈاٹ کام،اسلام آباد

	زلزلہ متاثرین کی بڑی تعداد خیموں میں رہائش پذیر ہے

اس کے علاوہ ادارے کا کہنا ہے کہ وہ زلزلے سے متاثرہ علاقوں میں انسانی سمگلنگ کو روکنے کے لیے پاکستان کی حکومت کے ساتھ مل کر کام کر رہا ہے۔

اسلام آباد میں انٹرنیشنل آرگنائزیشن فار مائیگریشن کے ڈائریکٹر جنرل برونسن مکنلی نے ایک پریس کانفرنس میں بتایا کہ ان کا ادارہ اقوام متحدہ کے ساتھ مل کر پاکستان کے زلزلے سے متاثرہ علاقوں میں کام کر رہا ہے۔

انہوں نے کہا کہ آئی او ایم آپریشن ونٹر ریس کے تحت پانچ ہزار فٹ سے زائد کی بلندی والے علاقوں میں سات ہزار ٹین کی چھتیں، تعمیراتی کٹس جس میں گھروں اور عمارتوں کو بنانے کی تمام چیزیں شامل ہوں گی زلزلے سے متاثرہ علاقوں میں فراہم کرے گی۔

گھروں کی تعمیر نو کے بارے میں آئی او ایم کی عہدیدار مریم کھوکھر نے تفصیل بتاتے ہوئے کہا کہ انڈونیشیا کے سونامی سے متاثرہ جزیرے آچے میں سب سے پہلے گھروں کی تعمیر نو کے لیے تعمیراتی کٹس بنانے کی فیکٹریاں لگئی گئی تھیں۔

ان کے مطابق یہ تجربہ نہایت ہی کامیاب رہا تھا اور اب آئی او ایم کو امید ہے کہ پاکستان میں زلزلے سے متاثرہ علاقوں میں بھی لوگ اس طرح کی تعمیراتی کٹس کے ذریعے اپنے گھر بنا سکیں گے۔ ان کا کہنا ہے کہ یہ گھر زلزلے کی شدت کو بھی برداشت کر سکیں گے۔

آئی او ایم کے مطابق پاکستان کے زلزلے سے متاثرہ علاقوں میں انسانی سمگلنگ کا خدشہ تو ہے مگر ابھی تک وہاں کسی قسم کے ایسے شواہد نہیں ملے ہیں جو یہ ثابت کر سکیں کے وہاں انسانی سمگلنگ ہوئی ہے۔ اس بارے میں مریم کھوکھر نے کہا کہ عموما قدرتی آفات میں یہ ہوتا ہے کے انسانی سمگلنگ میں ملوث گروہ لوگوں کو بہتر مستقبل کا لالچ دے کر یا ان کی غربت اور مجبوریوں کا فائدہ اٹھا کر عورتوں اور بچوں کی سمگلنگ کرتے ہیں۔

آئی او ایم کے ڈائریکٹر جنرل کے مطابق پاکستانی حکومت کا یہ قدم لائق تحسین ہے کہ اس نے فی الحال لاوارث بچوں کو گود لینے کی اجازت نہ دینے کا فیصلہ کیا ہے۔