عبدالحئی کاکڑ صحافی، پشاور

	یو این ایچ سی آر پاکستان میں خیمہ بستیاں بسانے اور ان کا انتظام و انصرام کرنے کا تجربہ رکھتی ہے

اسلام آباد میں یو این ایچ سی آر کےترجمان بابر بلوچ نے بی بی سی کو بتایا کہ سوموار سے وسیع پیمانے پر شروع ہونے والے پروگرام کے تحت فوجیوں اور متاثرہ افراد کو خیمے لگانے سے قبل صاف پانی کی دستیابی، نکاسی آب کے خاطر خواہ انتظام اور علاج معالجے کی بنیادی سہولیت کی فراہمی کے بارے میں خصوصی تربیت دی جائےگی۔

بابر بلوچ کاکہنا تھا کہ سردی کے آمد کے ساتھ ساتھ صوبہ سرحد اور کشمیر میں ان مقامات میں بیماریاں زیادہ پھیل چکی ہیں جہاں پر بلا سوچے سمجھے خیمے لگائے گئے ہیں۔

بابر بلوچ نے کہا کہ ان کی ٹیمیں متاثرہ علاقوں میں پہنچ چکی ہیں جہاں پر وہ خیموں میں مقیم افراد کو صحت اور صفائی کے علاوہ آگ جلانے کے بارے میں خصوصی تربیت دے رہے ہیں۔

بابر بلوچ نے مزید بتایا کہ سوموار کو مظفر آباد میں شروع ہونے والے تربیتی کورسز کیلیے یو این ایچ سی آر کے غیر ملکی ماہرین پاکستان پہنچ گئے ہیں۔ یو این ایچ سی آر کے ماہرین کا کہنا ہے کہ زلزلہ سے متاثرہ علاقوں میں جو لا کھوں خیمے مزید لگنے ہیں ان کے لیے حکومت پاکستان کو اب مناسب مقام کے تعین کے ساتھ وہاں پر زندگی کی دیگر بنیادی ضروریات کی فراہمی کے لیے منصوبہ بندی کرنی ہوگی بصورت دیگر لوگوں خصوصا بچوں میں بیماریوں کے پھیلنے کے خدشات بڑھ جائیں گے۔

یو این ایچ سی آر گزشتہ تیس سال سے پاکستان میں خیمہ بستیاں بسانے اور ان کا انتظام و انصرام کرنے کا تجربہ رکھتی ہے۔