علی سلمان بی بی سی اردو ڈاٹ کام بالا کوٹ

	بچوں کی قبریں وہیں بنانا پڑیں جہاں وہ کبھی کھیلتے تھے

دیکھو بچو ہاتھی آیا
ساتھ میں اپنا بچہ لایا
چھوٹی چھوٹی آنکھوں والا
لمبے لمبے کانوں والا
سونڈ سے پانی پیتا ہے
چڑیا گھر میں رہتا ہے

تباہ شدہ بالا کوٹ میں ننھی کلثوم نے یہ نظم مجھے لہک لہک کر سنائی۔اس دوران اس نے انگوٹھے کانوں پر رکھ کر ہاتھوں سے اشاروں کے ذریعے ہاتھی کے کان بنائے، پھر ناک پر دونوں مٹھیاں رکھ کر ہاتھی کی سونڈ بنائی۔

کلثوم کو شاید علم نہیں کہ کتنی بڑی قیامت اس پر گزر چکی ہے اور کتنے بڑے مصائب ابھی اس کی راہ دیکھ رہے ہیں۔

	سکول کے بچوں کی کتابیں اور بیگ ان کی راہ تکتے رہے

کلثوم کی دیکھ بھال کسی حد تک ایک غیر سرکاری فلاحی ادارہ کر رہا ہے جس کے تحت کئی لاواث بچوں کو اسلام آباد اور راولپنڈی بھی منتقل کر دیا گیا ہے ۔
لیکن کئی بچے اب بھی ان شہروں میں آوارہ پھرتے یا امدادی کیمپوں کے سامنے قطار لگائے کھڑے دکھائی دیتے ہیں۔

بعض بچوں نے باقاعدہ بھیک مانگنا شروع کر دیا ہے اور کسی بھی نووارد کو دیکھ کر ہاتھ پھیلا دیتے ہیں۔

بالا کوٹ شہر میں ایک ہی مقام پر سب سے زیادہ اموات والی جگہیں سکول تھے کیونکہ ہر عمارت میں سینکڑوں بچے ہلاک ہوئے۔

جناح مسلم سکول کا محض ایک حصہ گرا تو چودہ بچے اپنی استانی سمیت ہلاک ہوگئے جبکہ گورنمنٹ ہائی سکول بالا کوٹ تو تہہ بالا ہوگیا۔اس سکول کے بارے میں مقامی لوگوں کا کہنا ہے ہلاک ہونے والوں کی تعداد سینکڑوں میں ہے۔ یہ سن کر مجھے تعجب نہیں ہوا کیونکہ اس سکول کا ملبہ وہ واحد جگہ ہے جہاں بالاکوٹ میں سب سے زیادہ بدبو آرہی تھی۔ مقامی لوگوں کا کہنا ہے کہ اس ملبے کے نیچے ابھی بھی ننھے بچوں کی بے کفن لاشیں ہیں۔

	نعمان کو زلزلے کے دن پیٹ کے درد نے بچا لیا

اس تازہ قبرستان کی ایک اجتماعی قبر میں اکتالیس جبکہ دوسری میں تینتالیس بچے دفن ہیں۔اکتالیس بچوں کی اجتماعی قبر پر ٹین کا ایک بڑا سا ٹکٹرا رکھا ہے جس پر لکھا ہے:

’یہ ایک نامعلوم بچے کی قبر ہے‘

ایک اجتماعی قبر کے اوپر لکڑی گاڑ کر سکول کی سبز ٹوپی ٹانگ دی گئی ہے۔
یہ بچے جن کی باقاعدہ تدفین کی گئی اور وہ جو ملبے تلے ہی دب کر مر گئے ان میں سے بے شمار کی تاحال شناخت نہیں ہوسکی اور شائد کبھی نہیں ہو سکے گی۔

اسی سکول کے ملبے پر مجھے ایک خاندان۔ ملا یہ لوگ ایک بچے اور اس کی ماں کو تلاش کر رہے تھے جو زلزلہ آنے کے کئی دن بعد تک نہیں مل پائے۔

بالاکوٹ کے ہائی سکول کا ایک بچہ نعمان زمان اس لیے بچ گیا کہ اس کے پیٹ میں درد ہوا تو وہ چھٹی لیکر گھر چلا گیا اسی دوران سکول گرگیا اس کا بھائی بھی مرگیا اور تمام دوست بھی ہمشہ کے لیے بچھڑگئے۔

اس بچے نے اپنے بھائی اور دوستوں کی تدفین ہوتے دیکھی ہے یہ بچہ اب بھی وہیں پھرتا رہتا ہے۔

	خیموں میں قائم سکول