ذوالفقار علی بی بی سی اردو ڈاٹ کام ، اسلام آباد

	یاسین ملک زلزلے کے متاثرین کے لئے خیمے اور سیلیپنگ بیگ لائے ہیں ۔

خودمختار کشمیر کی حامی تنظیم جموں کشمیر لبریشن فرنٹ کے سربراہ یاسین ملک پیر کو لاہور پہنچے تھے جہاں سے وہ منگل کی رات کو اسلام آباد پہنچ گئے ۔یاسین ملک بھارت کے زیر انتظام کشمیر کے پہلے رہنما ہیں جو امدادی سامان لے کر آئے ہیں ۔

یاسین ملک نے بی بی سی سے گفتگو کرتے ہوئے کہا کہ وہ کشمیر اور پاکستان کے صوبہ سرحد میں زلزلے کے متاثرین کے لئے خیمے اور سیلیپنگ بیگ اپنے ساتھ لائے ہیں ۔

انھوں نے کہا کہ وہ بدھ کو راولپنڈی اور اسلام آباد کے مختلف ہسپتالوں میں زلزلے کے باعث زخمی ہونے والے زیر علاج لوگوں کی عیادت کریں گے اور جمعرات کو مظفرآباد جائیں گے ۔

ان کا کہنا ہے کہ وہ زلزلے سے متاثر ہونے والے پاکستان کے زیر انتظام کشمیر کے دوسرے علاقوں کے ساتھ ساتھ پاکستان کے صوبہ سرحد میں بھی جائیں گے ۔

یاسین ملک نے مزید کہا کہ انھوں نے آج اسلام آباد میں منعقد ہونے والے پاکستان کی کشمیر کمیٹی کے اجلاس میں بھی شرکت کی ۔

کشمیر کمیٹی کے چیرمین حامد ناصر چھٹہ کی سربراہی میں ہونے والے اس اجلاس میں ایک قرارداد منظور کی گئی جس میں بھارتی حکومت سے کہا گیا کہ وہ بین الااقوامی ایڈ ایجنسیز کو اپنے زیر انتظام کشمیر میں زلزلے سے متاثرہ علاقوں میں کام کرنے کی اجازت دے اور ساتھ ہی یہ بھی کہا گیا کہ بھارت کی حکومت پاکستان کے ایک پارلیمانی وفد کو بھارت کے زیر انتظام کشمیر میں امدادی سامان لے کر جانے کی اجازت دے ۔

کشمیر کمیٹی کے اجلاس میں یاسین ملک کے مطابق حکمران جماعت کے سربراہ چوہدری شجاعت حسین ، وزیر خارجہ خورشید قصوری ، وزیر دفاع راؤ سکندر اقبال اور جماعت اسلامی کے نائب امیر پروفیسر غفور احمد نے بھی اجلاس میں شرکت کی۔

یاسین ملک نے کہا کہ پاکستان اور اسکے زیر انتظام کشمیر کے متاثرہ علاقوں اور لوگوں کی بحالی کے لئے بھارت کے زیر انتظام کشمیر کے عوام ہر ممکن تعاون کرنے کے لئے تیار ہیں اور وہ ان کو مشکل کی اس گھڑی میں تہنا نہیں چھوڑیں گے۔

انھوں نے کہا کہ کشمیر کے دوسری جانب کے لوگ اجازت ملنے پر امدادی سرگرمیوں میں حصہ لیینا چاہتے ہیں ۔