مسئلہ کشمیر کے حل سے جنوبی ایشیاء میں نئے دور کا آغاز ہوگا: مشرف

اس ملاقات کے بارے میں فوری طور پر کچھ نہیں کہا گیا اور میڈیا کو یہ بتایا کہ دنوں رہنماؤں کی بات چیت کے حوالے سے ایک مشترکہ بیان بعد میں جاری کیا جائے گا۔

اس ملاقات میں یہ طے پایا ہےکہ بھارتی وزیرِ اعظم من موہن سنگھ جلد ہی پاکستان کا دورہ کریں گے۔

دونوں رہنماؤں نے ملاقات میں اس بات عزم کیا کہ نزاعی امور کو حل کیا جانا چاہیے تاکہ خطے میں امن کو فروغ ہو۔

پاکستانی وفد میں جنرل پرویز مشرف کے ساتھ نیشنل سیکورٹی کونسل کے سیکٹری طارق عزیز اور واشنگٹن میں پاکستان کے سفیر جہانگیر کرامت کے علاوہ منیر اکرم اور وزیرِ خارجہ خورشید محمود قصوری شامل تھے۔

اس ملاقات سے قبل جنرل اسمبلی کے اجلاس سے خطاب کرتے ہوئے جنرل پرویز مشرف نے کہا تھا کہ بھارت کے ساتھ جاری مذاکرات سے جنوبی ایشیاء میں امن اور تعاون کے ایک نئے دور کا آغاز ہوگا۔

انہوں نے کہا کہ اگر کشمیر کے مسئلے کا حل نکل آیا تو دنوں ملکوں کے درمیان تصادم اور کشاکش کا سلسلہ ختم ہو جائے گا۔

صدر پرویز مشرف نے عالمی سطح پر اقتصادی ناہمواری کا خاص طور سے ذکر کیا اور کہا کہ عالمگیریت نے خوشحالی میں بھی اضافہ کیا ہے اور غریبی میں بھی۔ بین الاقوامی تجارت اور مالیات کے ضابطے غریبوں کمزوروں کے خلاف جاتے ہیں۔

صدر مشرف نے کہا کہ وہ چاہتے ہیں کہ بھارت کے ساتھ جاری جامع مذاکرات نتیجے پر منتہج ہوں۔ ’انہوں نے کہا کہ دونوں ملکوں کو نفرت اور تاریخ اور کشاکش اور تصادم میں پھنسے نہیں رہنا چاہیئے لہذا جموں اور کشمیر کا مسئلہ منصفانہ انداز سے حل ہونا چاہیے اور اس کا حل بھارت، پاکستان اور سب سے بڑھ کر کشمیروں کو قبول ہو۔

انہوں نے کہا کہ اقوامِ متحدہ کی سلامتی کونسل کو عمومی نشستوں کی رکنیت میں کھلے دل کا مظاہرہ کرنا چاہیے۔ کونسل کو نئے اور خاص ارکان میں اضافے کی بنا پر نہیں بلکہ اقوامِ متحدہ کے رکن ممالک کے حوالے سے مزید نمائندہ ہونا چاہیے۔