ریاض سہیل بی بی سی اردو ڈاٹ کام، کراچی

پیر کی صبح کشمور ضلع میں تنگوانی کے قریب بھٹائی کالونی کے مقام پر پولیس اور رینجرز کی چیک پوسٹ کے نزدیک دو زوردار دھماکے ہوئے جن میں کوئی جانی نقصان نہیں ہوا۔

کندھ کوٹ پولیس کا کہنا ہے کہ یہ دھماکہ راکٹ سے کیا گیا ہے۔ پولیس اور رینجرز نے علاقے کوگھیرے میں لے لیا ہے۔ تاہم پولیس نے دھماکوں کے اسباب سے لاعلمی کا اظہار کیا ہے۔

اس سے قبل اتوار کے روز کشمور کے قریب انڈس ہائی وے پر فوج کے ایک کارواں کے گزرنے کے دوران ایک دھماکہ ہوا جس میں پانچ افراد زخمی ہوگئے اور کارواں میں شامل گاڑیوں کے شیشے ٹوٹ گئے۔ دھماکے والی جگہ سے ایک سائیکل کے ٹکڑے ملے ہیں۔

بم ڈسپوزل عملے کا خیال ہے کہ دس پاؤنڈ وزنی بم دیسی ساخت کا تھا جو سائیکل پر رکھاگیا تھا۔ بم کو ریموٹ کنٹرول کے ذریعے چلایا گیا۔

گڈو تھانے پر فوج کے صوبیدار محمد رفیق کی درخواست پر نامعلوم افراد کے خلاف مقدمہ درج کیا گیا ہے۔

واضح رہے کہ کشمور میں بگٹی اور مزاری قبائل کے درمیان قبائلی تصادم جاری ہے۔ جس میں گزشتہ ہفتے تین افراد ہلاک ہوگئے تھے۔