ندیم سعید بی بی سی اردو ڈاٹ کام، ملتان

جنوبی پنجاب کے علاقوں میں قائم بے شمار دینی مدرسوں میں سے اکثر کی ’عمارتیں‘ خستہ حال ہیں۔

حادثہ جمعہ اور سنیچر کی درمیانی شب لڈن روڈ پر واقع گاؤں چک چار سو سینتالیس ای بی میں قائم جامعہ قادریہ اسلامیہ میں اس وقت پیش آیا جب مدرسے کے ایک رہائشی کمرے کی چھت تیز بارش کے باعث نیچے آ گری۔

کمرے میں سوئے ہوئے بارہ طالبعلموں میں سے چار موقع پر ہی ہلاک ہوگئے۔ ہلاک ہونے والوں کے نام محمد امین، محمد نعیم، وسیم مرتضیٰ اور محمد عثمان معلوم ہوئے ہیں جبکہ زخمیوں کے نام محمد وسیم، محمد سلیم، مدثر علی، محمد عابد، عبداللہ، محمد سعید، محمد افضل اور ملازم حسین بتائے گئے ہیں۔

زخمیوں کو بورے والہ کے تحصیل ہیڈ کوارٹر ہسپتال میں داخل کرایا گیا ہے۔ تاہم ایک زخمی محمد سلیم کو تشویشناک حالت کے باعث بہتر علاج معالجے کے لیے ملتان کے نشتر ہسپتال لایا گیا ہے۔

چند ماہ قبل ڈیرہ غازی خان کے ایک گاؤں میں بھی اسی طرح دینی مدرسے کی چھت گرنے سے متعدد طالبعلم ہلاک ہوگئے تھے۔ جنوبی پنجاب کے پس ماندہ علاقوں میں قائم بے شمار دینی مدرسوں میں سے اکثر کی ’عمارتیں‘ خستہ حال ہیں اور زیادہ ترکچی دیواروں اور چھتوں سے تعمیر کردہ ہیں جو موسمیاتی تغیر کا مقابلہ نہیں کر پاتیں۔