اعجاز مہر بی بی سی اردو ڈاٹ کام، اسلام آباد

پاکستان میں ریل حادثات کی شرح دنیا کے دیگر ممالک کی نسبت خاصی زیادہ ہے۔

وقفہ سوالات کے لیے حکومتی رکن مہناز رفیع کے سوال پر پیش کردہ اپنے تحریری جواب میں وزیر نے بتایا کہ جنوری سن دوہزار دو سے جولائی دو ہزار پانچ تک پیش آنے والے ان حادثات میں دو سو چھیاسی مسافر ریل گاڑیوں جبکہ دو سو مال گاڑیوں کو حادثات پیش آئے۔

حکومتی معلومات کے مطابق ان حادثات میں ریل کی پٹڑی کی خرابی کی وجہ سے ایک سو چونتیس، میکینیکل خرابی کے باعث بیاسی، ریلوے کراسنگ سے گزرتے وقت لوگوں کی غیر ذمہ داری کی بنا پر ایک سو چوالیس جبکہ انسانی غفلت کی وجہ سے باون حادثات ہوئے۔

وزیر کے مطابق ان حادثات کی وجہ پاکستان ریلوے کے محکمے کو پونے آٹھ کروڑ روپوں کے لگ بھگ نقصان برداشت کرنا پڑا۔

ان اعداد وشمار کو دیکھتے ہوئے ماہرین کا کہنا ہے کہ پاکستان میں ریل حادثات کی شرح دنیا کے دیگر ممالک کی نسبت خاصی زیادہ ہے۔

وزیر نے جس مدت کے حادثات بتائے ہیں اس میں حال ہی میں گھوٹکی میں پیش آنے والا بدترین ریل حادثہ بھی شامل ہے۔ اس واحد حادثے میں ہلاک شدگان کے حکومتی اعداد وشمار تو کم تھے لیکن موقع پر موجود لوگوں نے اس کی تعداد کہیں زیادہ بتائی تھی۔

وزیر کے مطابق ان حادثات کی تحقیقات کروائی گئی اور جن کمزوریوں اور خرابیوں کی نشاندہی کی گئی انہیں دور کرنے کے لیے حکومت نے متعدد اقدامات بھی کیے ہیں۔