بعض حلقے پاکستان کی اسرائیل پالیسی کو امریکی خوشنودی کا حصول قرار دیتے ہیں

اس سے پہلے استنبول میں پاکستانی وزیر خارجہ خورشید محمود قصوری نے اسرائیلی وزیر خارجہ سے ملاقات کے بعد کہا تھا کہ اسرائیل کو تسلیم کرنے کے بارے میں پاکستان کی خارجہ پالیسی میں کوئی تبدیلی نہیں آئی ہے۔

صدر جنرل پرویز مشرف نے کہا کہ دنیا یہ چاہتی ہے کہ پاکستان کو مشرق وسطیٰ کے سلسلے میں کوئی کردار ادا کرنا چاہیے ہیں۔

پاکستان کی اسرائیل پالیسی پر مشرف حکومت کو خمب اختلاف کے جانب سے شدید تنقید کا سامنا کرنا پڑھ رہا ہے۔

حزب اتحاد کی جماعت پاکستان پیپلز پارٹی نے کہا کہ اسرائیل پالیسی پر پارلیمنٹ کو اعتماد میں نہیں لیا گیا۔

حزب اختلاف کی مذہبی جماعتوں کے اتحاد متحدہ مجلس عمل کے سربراہ قاضی حسین احمد نے جنرل پرویز مشرف کی اسرائیل پالیسی کی شدید مذمت کی ہے۔

انہوں نے اسے بانی پاکستان محمد علی جناح کے نظریات کی صریحاً خلاف ورزی قرار دیا ہے اور کہا ہے کہ جمعہ کو اس پالیسی کے خلاف ملک بھر میں احتجاج کے طور پر یوم سیاہ منایا جائے گا۔

انہوں نے کہا ہے کہ وزیرخارجہ کا سیاہ جھنڈیوں سے استقبال کیا جائے گا اور اس پالسی کے خلاف پوری قوم احتجاج کرے گی۔

قاضی حسین احمد نے کہا ہے کہ حکومت کے دن گنے جا چکے ہیں اور اب حکومت سے اس کی تمام باتوں کا حساب لیا جائے گا۔

ایک سوال کے جواب میں ان کا کہنا تھا کہ اسرائیل کے ساتھ فلسطینی ریاست کا بننا محض ایک خوش فہمی ہے۔ اسرائیل اس سے پہلے یاسر عرفات کے ساتھ مفاہمت سے بھی منحرف ہو چکا ہے۔

قاضی حسین احمد نے کہا ہے کہ استنبول ملاقات دراصل جنرل مشرف کے یہودی کانگریس سے خطاب کے لیے کی جا رہی ہے۔