عدنان عادل بی بی سی اردو ڈاٹ کام، لاہور

مظاہرین نے احتجاجی پلے کارڈ اٹھا رکھے تھے

تاہم جماعت اسلامی نے کہا ہے کہ اسرائیل کے وزیرِخارجہ سلوان شلوم سے ملاقات کرنے پر وزیر خارجہ خورشید قصوری کی ملک واپسی پر احتجاجاً ان کا کالی جھنڈیوں سے استقبال کیا جائے گا۔

اسرائیل اور پاکستان کے پہلے با ضابطہ سرکاری رابطہ کے خلاف پشاور کے اخباروں میں متحدہ مجلس عمل کی طرف سے احتجاجی مظاہرہ کے اشتہار شائع ہوئے تھے لیکن اس میں صرف جماعت اسلامی نے شرکت کی اور جمعیت علمائے اسلام (فضل الرحمن گروپ) اس میں شریک نہیں ہوئی۔

پشاور میں ہمارے نمائندے ہارون رشید کے مطابق جماعت اسلامی کے امیر قاضی حسین احمد نے مسجد مہابت خان سے یادگار چوک تک نکلنے والے جلوس کی قیادت کی جس میں دو سو افراد شریک تھے۔ بینرز پر اسرائیل سے دوستی نامنظور لکھا تھا۔

قاضی حسین احمد نے اجتماع سے خطاب کرتے ہوئے کہا کہ حکومت پارلیمنٹ سے باہر فیصلے کر رہی ہے اس لیے اب وہ بھی مسئلوں کا حل سڑکوں پر ڈھونڈیں گے اور لوگ تحریک کے لیے تیار ہوجائیں۔

ان کا کہنا تھا کہ پاکستان کو بچانے کا واحد طریقہ یہ ہے کہ صدر جنرل پرویز مشرف کو ہٹایا جائے۔ انہوں نے کہا کہ پاکستانیوں کا فلسطین کے معاملہ سے براہ راست تعلق ہے کیونکہ وہاں پر قبلہ اول بیت المقدس واقع ہے۔

پشاور کے مظاہرے سےقاضی حسین احمد نے خطاب کیا

لاہور میں جماعت اسلامی نے آج اپنے صدر مقام منصورہ کے باہر سڑک پر جمعہ کی نماز کے بعد ایک احتجاجی مظاہرہ کیا جس میں تقریباً ڈیڑھ سو افراد نے شرکت کی۔

جماعت اسلامی کے کارکنوں نے دو رویہ سڑک کا ایک حصہ بند کردیا تھا اور دو بینرز لگے ہوئے تھے جن پر لکھا تھا۔ ’اسرائیل کا جو یار ہے غدار ہے‘ اور ’یہودیوں کا ایک ہی علاج ، الجہاد الجہاد۔‘

جماعت کے رہنماؤں حافظ ادریس اور امیرالعظیم وغیرہ، نے اس موقع پر حکومت کی مذمت کی اور کہا کہ وہ اسلام آباد کے ایوانوں کا گھیراؤ کریں گے۔ جماعت اسلامی کے سیکرٹری جنرل منور حسن نے کہا کہ جب خورشید قصوری ملک واپس آئیں گے اس روز لوگ کالی پٹیاں باندھیں اور عمارتوں پر سیاہ پرچم لہرائے جائیں اور ان کا کالی جھنڈیوں سے استقبال کیا جائے۔

کوئٹہ میں ہمارے نمائندے عزیزاللہ کے مطابق مجلس عمل اور مسلم لیگ نواز نے جامع مسجد سورج گنج بازار سے میزان چوک تک جلوس نکالا جس میں تقریباً ڈیڑھ سو افراد شریک تھے۔ اس اجتماع میں جمعیت علمائے اسلام کے رکن قومی اسمبلی مولوی نور محمد اور جماعت اسلامی بلوچستان کے جنرل سیکرٹری عبدالمتین نے شرکت کی۔

حکومت پارلیمنٹ سے باہر فیصلے کررہی ہے اس لیے اب وہ بھی مسئلوں کا حل سڑکوں پر ڈھونڈیں گے اور لوگ تحریک کے لیے تیار ہوجائیں قاضی حسین احمد

کراچی سے بی بی سی کے نمائندے ریاض سہیل کے مطابق ایم ایم اے کا ایک احتجاجی جلسہ لیاری میں موسی لین میں پٹھان مسجد کے باہر ہوا جس میں تین سو افراد نے شرکت کی۔ جلسے سے جماعت اسلامی کے رہنما معراج الہٰدی اور شیعہ رہنما حسن ترابی نے خطاب کیا اور کہا کہ اسرائیل سے رابطہ ملک کے اصولی موقف کے خلاف ہے۔

انہوں نے کہا کہ قائد اعظم محمد علی جناح سے لیکر نواز شریف تک کسی رہنما نے اسرائیل کو تسلیم نہیں کیا اور موجودہ حکومت اس کو تسلیم کرنے کی تیاری کر رہی ہے۔ انہوں نے کہا کہ اس اقدام سے پوری قوم کی گردن شرم سے جھک گئی ہے۔