ریاض سہیل بی بی سی اردو ڈاٹ کام، کراچی

گزشتہ ہفتے صدر مشرف نے پولیس کے افسران کا ایک خصوصی اجلاس سے خطاب کیا تھا

آئی جی پولیس سندھ، اسد جہانگیر کی تشکیل کردہ چار افسران پر مشتمل کمیٹی کے سربراہ ایڈیشنل آئی جی سندھ ہوں گے جب کہ اراکین میں ڈی آئی جی سی آئی ڈی، ڈی آئی جی اسپیشل برانچ، اور اے آئی جیز آپریشنز سندھ شامل ہوں گے۔

مانیٹرنگ کمیٹی کو ہدایت کی گئی ہے کہ وہ ہر ہفتے اپنی کارکردگی کی تفصیل آئی جی سندھ کو پیش کرے۔

پولیس ذرائع کا کہنا ہے کہ اس مہم میں کراچی خاص اہمیت کا حامل ہے، جہاں مبینہ طور پر کئی دہشتگرد اور فرقہ وارانہ گروپ سرگرم ہیں۔ جبکہ کچھ مدرسوں کی بھی نگرانی کی جا رہی ہے۔

دوسری جانب پابندی کے باوجود لاؤڈ اسپیکر استعمال کرنے پر کالعدم سپاہ صحابہ کے رہنما اور ملت اسلامیہ پاکستان کے سرپرست مولانا علی شیر حیدری سمیت تین مذہبی رہنماؤں کے خلاف مقدمہ درج کرلیا گیا ہے۔

گلبہار پولیس کراچی نے مقدمے میں نامزد مولانا محمد عاصم کو گرفتار کرلیا ہے۔
واضح رہے کہ صدر مشرف نے گزشتہ روز اسلام آباد میں منعقدہ پولیس افسران کے اجلاس میں کالعدم تنظیموں، مذہبی منافرت پھیلانے، بغیر اجازت لاؤڈ اسپیکر کے استعمال اور منافرت اور تعصب آمیز لٹریچر کے خلاف ملک بھر میں کارروائی کی ہدایات جاری کی ہیں۔