مبشر زیدی بی بی سی اردو ڈاٹ کام، اسلام آباد

بہت سے دیہات خالی کرلیے گئے ہیں

گو اس سیلاب سے فصلوں، املاک اور مویشیوں کو نقصان ہوا ہے مگر ابھی تک کہیں سے کسی جانی نقصان کی اطلاع نہیں ملی ہے۔

دریائے چناب میں جمعرات کو بھارت کی طرف سے پانچ لاکھ کیوسک سے زائد پانی چھوڑے جانے کے بعد پنجاب کے بڑے شہروں سیالکوٹ، گجرات، گوجرانوالہ، منڈی بہاؤالدین، وزیر آباد، حافظ آباد، جھنگ اور سرگودھا کے اطراف میں دریائے چناب کے دونوں جانب گاؤں میں لوگوں کو دریا میں اونچے درجے کے سیلاب کے خطرے کے پیش نظر محفوظ مقامات پر منتقل ہونے کے لیے کہا گیا تھا۔

اس سلسلے میں پاکستانی فوج نے پانچ ہیلی کاپٹروں اور ایک ہزار سے زائد فوجیوں کی مدد سے لوگوں کو علاقے سے بحفاظت نکالنے کا کام شروع کر دیا ہے۔

فیڈرل فلڈ کمیشن کے ایک عہدیدار احمد کمال کا کہنا ہے کہ اس سیلاب کے باعث پندرہ سے زائد گاؤں زیر آب آئے ہیں جہاں سے اب تک آٹھ سو سے زائد لوگوں کو بحفاظت نکالا جا چکا ہے۔ ان کے مطابق کم از کم پانچ ہزار سے زائد لوگ ابھی تک ان زیر آب گاوں میں پھنسے ہوئے ہیں۔

تاہم آزاد ذرائع کا کہنا ہے کہ زیر آب آنے والے دیہاتوں کی تعداد سرکاری اعداد و شمار سے کہیں زیادہ ہے۔

ادھر فوج کی طرف سے جاری ہونے والے ایک بیان میں کہا گیا ہے کہ قادرآباد اور حافظ آباد کے درمیان شاہراہ پر واقع شادیاں گاؤں سے کم از کم پانچ سو افراد کو بحفاظت نکال لیا گیا ہے۔ فوج اور سول انتظامیہ سیلاب سے متاثرہ افراد کو دوائیاں اور خوراک فراہم کر رہی ہے۔

چناب میں ہیڈ مرالہ کے مقام سے پانی کا بڑا ریلا گزر چکا ہے جس کے بعد حکام کا کہنا ہے کہ کسی بڑے نقصان کا خطرہ ٹل گیا ہے۔ حکام کے مطابق اب ہیڈ مرالہ میں پانی کی سطح کافی نیچے آچکی ہے جبکہ خانکی اور قادرآباد میں پانی کی سطح بلند ہو رہی ہے اور وہاں اونچے درجے کا سیلاب ہے۔

خانکی کے مقام پر پانی کا گزر تین لاکھ اڑسٹھ ہزار کیوسک جبکہ قادرآباد میں پانی کا گزر تین لاکھ سینتالیس ہزار کیوسک ہے۔

دریائے سندھ میں چشمہ کے مقام پر پانی کی سطح بلند ہو رہی ہے اور وہاں درمیانے درجے کا سیلاب ہے۔

دریائے راوی میں پانی کی سطح بھی بلند ہو رہی ہے مگر فی الحال وہاں سیلاب کا خطرہ نہیں ہے۔

ادھر صوبہ سرحد میں دریائے کابل میں نوشہرہ کے مقام پر اور دریائے سوات میں منڈا کے مقام پر اونچے درجے کا سیلاب ہے اور پانی کی سطح گر رہی ہے۔