ریاض سہیل بی بی سی اردو ڈاٹ کام، کراچی

ایم کیو ایم اور تحریکِ انصاف کا موقف ہے کہ بلدیاتی انتخابات فوج کی نگرانی میں نہ ہوں

فوج کو اہم سیاسی معاملات کے حوالے ہی سے سہی، امن و امان کی صورتِ حال خراب ہونے سے بچانے کے بلانے کا مطالبہ آج کل پھر زور پکڑ رہا ہے اور اس کی وجہ بلدیاتی انتخابات ہیں۔

اس وقت صورتِ حال یہ ہے کہ تمام سیاسی اور مذہبی جماعتیں بلدیاتی انتخابات میں حصہ لینے کے لئے بیقرار ہیں۔

تاہم کراچی میں بلدیاتی انتخابات کے شیڈول کے اعلان سے قبل ہی صورتحال سنگین ہوگئی ہے۔ یہاں مختلف پارٹیوں کے کارکن قتل ہونےلگے ہیں۔

یہاں ایم کیو ایم اور ایم ایم اے ایک دوسرے پر سبقت لینے کے لئے کوشاں ہیں۔

سندھ میں بلدیاتی انتخابات فوج میں نگرانی میں کرائے جائیں یا نہیں؟ اس سوال پر سیاسی پارٹیاں بٹی ہوئی ہیں۔

کراچی کے کشیدہ حالات کے پیش نظر سب سے پہلے سنی تحریک نے یہ مطالبہ کیا تھا کہ انتخابات فوج کی نگرانی میں ہونے چاہئیں۔ اس مطالبے کی تائید اشارتاً وفاقی وزیر برائےمذہبی امور اعجازالحق نے یہ کہہ کر کی کہ انتخابات میں فوج کو طلب کرنے کا بھی آپشن زیر غور ہے۔

کراچی کے سابق سٹی ناظم نعمت اللہ نے بھی انتخابات کے دوران خونریزی کا خدشہ ظاہر کیا ہے۔اسلام آباد سے واپسی پر انہوں نے کہا کہ شفاف انتخابات کے انعقاد کے لئے فوج کی نگرانی ضروری ہے۔

متحدہ قومی موومنٹ کے زیر اہتمام گذشتہ روز منعقدہ کل جماعتی کانفرنس میں بھی اہم حکومتی شخصیات نے فوج کی نگرانی میں بلدیاتی انتخابات کرانے پر زور دیا۔

کانفرنس میں حکمران مسلم لیگ کے سربراہ چوہدری شجاعت حسین نے یہ موقف پیش کیا کہ فوج کی نگرانی میں انتخابات منعقد کرانے میں کوئی ہرج نہیں۔ مسلم لیگ کے سیکریٹری جنرل مشاہد حسین نے بھی شفاف اور آزادانہ بلدیاتی انتخابات کے لئے فوج کی نگرانی پر زور دیا۔

اسٹیبلشمینٹ کے قریب رہنے والے ان دونوں رہنماؤں کی ان باتوں سے سیاسی مبصرین یہ تاثر لے رہے ہیں کہ انتخابات میں فوج کا کردار ضرور متعین کیاگیا ہے۔جس کے لئے راہ ہمور کی جارہی ہے۔

لیکن ایم کیو ایم کا موقف تھا کہ انتخابات فوج کی نگرانی میں کرانے کی ضرورت نہیں ہے۔

وفاق اور سندھ میں حکومت کی اہم حلیف جماعت متحدہ قومی موومنٹ کا اس موقف سے شدید اختلاف ہے۔

واضح رہے کہ ایم کیو ایم بلدیاتی انتخابات سے ہی مقبول ہوکر ملکی سیاسی دھارے میں شامل ہوئی تھی۔ وہ ان انتخابات کو بہت زیادہ اہم سمجھتی ہے۔

ایم کیو ایم کے پارلیمانی لیڈر ڈاکٹر فاروق ستار کا کہنا ہے کہ انتخابات میں فوج طلب کرنی کی کوئی ضرورت نہیں۔ انہوں نے تعجب کا اظہار کیا کہ جماعت اسلامی صدر مشرف کو وردی میں قبول کرنےکو تیار نہیں لیکن فوج کی نگرانی میں انتخابات کا مطالبہ کررہی ہے۔

تحریک انصاف کے سربراہ عمران خان کا موقف بھی ایم کیو ایم کے موقف سے ہم آہنگ ہے البتہ وہ فوج کو ان انتخابات سے اس لیے دور دیکھنا پسند کرتے ہیں کہ کہ فوج ایک’ آمر کے تابع ہے لہذا وہ کیسے غیرجانبدارانہ کردار ادا کرسکتی ہے۔‘

پی پی سمجھتی ہے کہ انتخابات انتہائی مشکل حالات میں ہو رہے ہیں۔ سندھ پی پی پی کے صدر سید قائم علی شاھ نے بتایا کہ ’ہم نے انتخابات فوج کی نگرانی میں کرانے یا نہ کروانے کا ابھی تک کوئی فیصلہ نہیں کیا ہے۔‘