مبشر زیدی بی بی سی اردو ڈاٹ کام، اسلام آباد

منموہمن سنگھ نے یہ بیان سیاچن کے حالیہ دورے کے موقع پر دیا تھا۔

دفتر خارجہ کے ترجمان جلیل عباس جیلانی نے ہفتہ وار پریس بریفنگ میں کہا ہے کہ یہ بیان سیاچن کے بارے میں بھارتی پالیسی میں تبدیلی کا اشارہ ہے۔

انہوں نے کہا کہ پاکستان ہمیشہ سے سیاچن کے تنازعے کے پر امن حل کا حامی رہا ہے اور بھارت پر الزام لگایا کہ اس نے سیاچن کے حصے پر زبردستی قبضہ جما رکھا ہے۔

ترجمان کے مطابق سیاچن پاکستان کا حصہ ہے اور بھارت نے کراچی اور شملہ معاہدے کی خلاف ورزی کرتے ہوئے سیاچن کے ایک حصے پر قبضہ کر لیا تھا۔

ترجمان نے کہا کہ وہ امید کرتے ہیں کہ بھارت غیر مشروط طور پر سیاچن سے اپنی فوجیں نکال لے گا جیسا کہ دونوں ممالک کے درمیان 1989 میں ہونے والے معاہدے میں طے پایا تھا۔ترجمان کے مطابق اگر بھارت سیاچن سے اپنی فوجیں نکال لے تو سیاچن خود بخود امن کا پہاڑ بن جائے گا۔

ترجمان سے جب بھارتی وزیر اعظم کے اس بیان کے بارے میں پوچھا گیا جس میں انہوں نے پاکستان کے شمالی علاقے بلتستان کو بھی متنازعہ قرار دیا تھا۔ ترجمان کا کہنا تھا کہ پاکستان کا تو موقف ہی یہ ہے کہ بھارت کے زیر انتظام کشمیر، پاکستان کے زیر انتظام کشمیر اور شمالی علاقہ جات کو اقوام متحدہ کے ذریعے رائے شماری کے مطابق حل کرنا چاہئے۔ ترجمان نے کہا کہ بھارت اب تک بھارت کے زیر انتظام کشمیر کو اپنی سرزمین قرار دیتا رہا ہے۔

ترجمان نے کہا کہ اگر بھارت جموں اور کشمیر کے تمام علاقے کو متنازعہ تسلیم کرنے پر راضی ہو جائے تو یہ مسئلہ اقوام متحدہ کی قراردادوں کے مطابق حل کیا جا سکتا ہے۔

ترجمان نے سابق امریکی سفیر بلیک ول کے اس بیان کو غیر حقیقی قرار دیا جس میں سابق امریکی سفیر نے کہا تھا کہ کشمیر کے مسئلے کا واحد حل لائن آف کنٹرول کو مستقل سرحد بنانا ہے۔ ترجمان نے کہا کہ سابق امریکی سفیر کو کشمریوں کی خواہشات کا احترام کرنا چاہئیے۔انہوں نے کہا کہ اگر لائن آف کنٹرول کو ہی مستقل سرحد تسلیم کرنا ہے تو پھر پاکستان اور بھارت کے درمیان کشمیر کا کوئی تنازعہ نہ ہوتا۔