عزیزاللہ خان بی بی سی اردو ڈاٹ کام ، کوئٹہ

بلوچستان میں سیکورٹی ایجینسیوں پر گذشتہ کئی ماہ سے مسلسل حملے ہورہے ہیں۔

یہ واقعہ شام سات بجے کے قریب یہاں کوئٹہ سے کوئی دو سو کلومیٹر دور بھاگ کے علاقے میں پیش آیا ہے۔ ڈیرہ مراد جمالی تھانے سے ایک پولیس اہلکار نے بتایا ہے کہ پولیس گاڑی معمول کی گشت پر تھی اور ڈیرہ مراد جمالی آرہی تھی کے راستے میں مروڑ موڑ پر نامعلوم افراد نے گاڑی پر فائرنگ شروع کر دی۔

انھوں نے کہا ہے کہ چونکہ یہ علاقہ زیادہ گنجان آباد نہیں ہے اور نہ ہی اس علاقے میں زیادہ ٹریفک ہوتی ہے اس لیے پولیس کو واقعہ کی اطلاع تاخیر سے ملی ہے۔

یہاں یہ اطلاعات بھی ملی ہیں کہ حملہ آور پولیس کی کلاشنکوف ساتھ لے گئے ہیں۔ ہلاک ہونے والے اہلکاروں میں سپاہی محمد ایوب اور ڈرائیور قادر بخش شامل ہیں۔

تاحال اس حملہ کی وجوہات معلوم نہیں ہو سکیں۔ متعلقہ حکام موقع پر پہنچ کر حالات کا جائزہ لے رہے ہیں۔

دریں اثنا بلوچستان کے انسپکٹر جنرل پولیس چوہدری یعقوب نے کہا ہے کہ نوشکی میں راکٹ فائرنگ اور بم دھماکوں میں ملوث چار افراد کو گرفتار کر لیا گیا ہے۔ انھوں نے صحافیوں کو بتایا ہے کہ گرفتار افراد نے تسلیم کیا ہے کہ وہ مختلف واقعات میں ملوث رہے ہیں۔ اس کے علاوہ انھوں نے کہا ہے کہ گزشتہ روز تربت میں بم دھماکے میں زخمی ہونے والے شخص نے بھی بم دھماکوں کے واقعات میں ملوث ہونے کا اقرار کیا ہے۔ یاد رہے گزشتہ روز تربت میں ایک دھماکے میں ایک شخص ہلاک اور ایک زخمی ہو گیا تھا زخمی کو پولیس نے گرفتار کر لیا تھا۔