 |  واقعہ گوادر کے مغربی ساحل سے کوئی پندر کلومیٹر دور پشوگان اور گنز کے درمیان پیش آیا |
گوادر کے قریب سمندر میں ڈوب جانے والی لانچ کے مچھیروں کی تلاش کا کام جاری ہے اور اب تک اطلاعات کے مطابق پندرہ افراد کو زندہ بچا لیا گیا ہے لیکن اس کی تصدیق نہیں ہو سکی۔ امدادی کارروائی سمندر میں جاری ہے جہاں ایک لانچ میں سوار افراد ڈوبی ہوئی لانچ کے مچھیروں کے لیے امدادی کارروائی جاری رکھے ہوئے ہیں۔ میرین سکیورٹی ایجنسی کے اہلکار لیفٹیننٹ امجد نے بتایا ہے کہ ان تک یہ اطلاعات پہنچی ہیں کہ پندر افراد کو زندہ بچا لیا گیا ہے اور باقی کی تلاش کا کام جاری ہے۔ ایک اندازے کے مطابق اس لانچ پر کوئی سترہ افراد سوار تھے لیکن بعض اطلاعات کے مطابق سواریوں کی تعداد زیادہ ہے۔ یہ لانچ جس کا نام سفینہ عادل بتایا گیا ہے کل یعنی جمعرات کو دوپہر کے وقت گوادر سے کوئی پندرہ کلومیٹر دور جیونی کے قریب ڈوب گئی تھی۔ میرین سکیورٹی ایجنسی کے اہلکار کے مطابق لانچ کراچی کی رجسٹرڈ تھی اور یہ کراچی سے دو مئی کو روانہ ہوئی تھی۔ اس میں مقامی افراد سوار تھے۔ ابھی تک یہ معلوم نہیں ہو سکا کہ لانچ کے ڈوبے کی وجہ کیا تھی۔ اس سے پہلے کی اطلاعات میں بتایا گیا تھا کہ صوبہ بلوچستان کے ساحلی شہر گوادر کے قریب ایک لانچ سمندر میں ڈوب گئی ہے۔ اس لانچ میں سترہ افراد سوار تھے جن میں سے دو کو بچا لیا گیا باقی تاحال لاپتہ ہیں۔ یہ واقعہ گوادر کے مغربی ساحل سے کوئی پندر کلومیٹر دور پشوگان اور گنز کے درمیان پیش آیا ہے۔ | 
یہ صفحہ دوست کو ای میل کیجیئے
پرِنٹ کریں
