ندیم سعید بی بی سی اردو ڈاٹ کام، ملتان

مظاہرے میں خواتین کے ایک بڑی تعداد نے شرکت کی

مظاہرے کا انتظام کئی کسان تنظیموں نے مل کر کیا تھا۔مظاہرے سے پہلے ایک سیمنار بھی منعقد کیا گیا جس میں مقررین نے ڈبلیو ٹی او کے، بقول ان کے، استحصالی قوانین پر روشنی ڈالی اور مطالبہ کیا کہ ڈبلیو ٹی او کا آئندہ سربراہ کسی ترقی پذیر یا غریب ملک سے لیا جائے۔

مظاہرین کا کہنا تھا ڈبلیو ٹی او کے تحت کام کرنے والے معاہدہ برائے زراعت (اے او اے) میں امیر ممالک نے اپنے زرعی شعبوں کو اعانتیں دینے کے لیے کئی راستے ڈھونڈ نکالے ہیں جبکہ ترقی پذیر اور غریب ممالک کی اس سلسلے میں سخت عالمی تـجارتی قوانین کے ذریعے حوصلہ شکنی کی جارہی ہے۔

مظاہرین نے حکومت سے مطالبہ کیا کہ وہ امیر ممالک کے دباؤ میں نہ آئے

انہوں نے حکومت سے مطالبہ کیا کہ وہ زراعت کے حوالے سے ترتیب دیے جانے والے عالمی تجارتی قوانین پر امیر ممالک کے دباؤ میں آنے کی بجائے اپنے کاشتکاروں کے مفاد میں فیصلے کرانے کی کوشش کرے۔ کاشتکاروں نے اراکین پارلیمان سے مطالبہ کیا کہ وہ عالمی تجارتی معاہدوں اور ان کے حوالے سے حکومت پاکستان کے مؤقف کو پارلیمان میں زیر بحث لائیں۔

مظاہرے میں خواتین کی ایک بڑی تعداد بھی موجود تھی۔