ہارون رشید بی بی سی اردو ڈاٹ کام، پشاور

گندھارا نوادرات کی نقلیں بھی بڑے پیمانے پر تیار کی جاتی ہیں

صوبہ سرحد کا آثار قدیمہ اور عجائب گھر کا محکمہ تقریبا ایک کڑوڑ روپے سے زائد کی لاگت سے اپریل میں اس ایک سالہ منصوبہ پر کام کا آغاز کرے گا۔ اس منصوبے کے لیے اسے اقوام متحدہ کے ادارہ یونیسکو کی مدد بھی حاصل ہے۔

محمکہ کے ڈائریکٹر پروفیسر ڈاکٹر احسان علی نے سنیچر کے روز پشاور میں صحافیوں کو اس اہم منصوبے کے بارے میں بریفینگ دیتے ہوئے کہا کہ اس منصوبے کی ضرورت اس لیے محسوس کی گئی کہ ابھی تک پاکستان بھر میں مختلف مقامات پر اور عجائب گھروں میں موجود گندھارا تہذیب کے نوادرات اور کا کوئی باقاعدہ جامع کمپوٹرازڈ ریکارڈ موجود نہیں۔

ان سے پوچھا کہ اس ڈاٹا سے فائدہ کیا ہوگا تو انہوں نے بتایا کہ اس سے تحقیق کرنے والوں اور چوری سے بچاؤ میں مدد ملے گی۔

قدیم گندھارا تہذیب پاکستان میں دریائے سندھ کے مغرب اور دریائے کابل کے شمال میں پشاور سے لے کر سوات اور دیر جبکہ افغانستان میں بامیان تک پھیلی ہوی تھی۔

اس تہذیب کے نوادرات دیکھنے کے لیے ہر سال ہزاروں غیرملکی سیاح اور محقق پشاور کا رخ کرتے رہتے ہیں۔