مبشر زیدی بی بی سی اردو ڈاٹ کام،اسلام آباد

گزشتہ برس اسلام آباد کے کمرشل علاقے بلیو ایریا میں ایک پلازہ کے لیے زمین پونے دو ارب روپے میں نیلام کی گئی

کیپیٹل ڈویلپمنٹ اتھارٹی کے زیر اہتمام ہونے والی اس نیلامی میں تیرہ ایکڑ زمین جو اسلام آباد کے مشہور کانفرنس ہال کنونشن سینٹر سے ملحقہ ہے فیصل آباد کے بزنس گروپ بی این پی نے خریدی ہے جو بسم اللہ، نیرا اور پیراگون نامی کمپنیوں پر مشتمل ہے۔

اس گروپ کے پاس امریکی ہوٹل چین رٹز کارلٹل کا مقامی لائسنس ہے۔ یہ گروپ بیس منزلہ فائیو سٹار ہوٹل تعمیر کرے گا جو تین سال کی مدت میں مکمل کیا جائے گا۔
اس نیلامی میں بی این پی کے علاوہ سعودی گروپ التمیمی، ایل جی لگژر گروپ، مین لین حسنین پاکستان لمیٹڈ اور پرل کنسلٹنگ نامی کمپنیوں نے اس نیلامی میں حصہ لیا۔

سی ڈی اے کے چیئرمین کامران لاشاری نے اس نیلامی کے بعد صحافیوں کو بتایا کہ یہ ملک کا جدید ترین ہوٹل ہو گا اور اس کی تعمیر دبئی کا مشہور تعمیراتی گروپ بالحاشہ کرے گا۔اس گروپ نے متحدہ عرب امارات کے تمام بڑے ہوٹل تعمیر کیے ہیں۔

یہ نیلامی اسلام آباد میں زمین کی تیزی سے بڑھتی ہوئی قیمتوں کا مظہر ہے۔ گزشتہ برس اسلام آباد کے کمرشل علاقے بلیو ایریا میں ایک پلازہ کی زمین پونے دو ارب روپے میں نیلام کی گئی تھی۔