اعجاز مہر بی بی سی اردو ڈاٹ کام، اسلام آْباد

آصف زرداری تیس دسمبر کو ملک سے باہر گئے تھے

پیپلز پارٹی کے مرکزی رہنماء راجہ پرویز اشرف نے آصف زرداری کی واپسی کا اعلان کرتے ہوئے کہا کہ وہ سولہ اپریل کو لاہور پہنچیں گے ۔

انہوں نے بتایا کہ منگل کے روز پیپلز پارٹی سیکریٹریٹ میں ایک اجلاس ہوا جس میں آصف علی زرداری نے فون پر ساتھیوں سے مشاورت کے بعد اپنی واپسی کی تاریخ کا اعلان کیا۔

راجہ پرویز اشرف نے مزید بتایا کہ صوبہ پنجاب پیپلز پارٹی نے تمام صوبائی عہدیداروں اور گزشتہ انتخابات میں پارٹی ٹکٹ پر عام انتخابات میں حصہ لینے والوں کے اور پارٹی کے ضلعی رہنماؤں کا پانچ مارچ کو لاہور میں طلب کرلیا ہے۔

ان کے مطابق اس اجلاس میں آصف علی زرداری کے استقبال کی تیاری کے لیے حکمت عملی مرتب کی جائے گی۔

آصف علی زرداری مسلسل آٹھ برس تک بد عنوانی کے الزامات کے قید میں گزارنے کے بعد سپریم کورٹ سے ضمانت منظور کیے جانے کے بعد رہا ہوگئے تھے۔

اپنی رہائی کے بعد انہوں نے صوبہ سندھ کا دورہ کیا تھا اور جب وہ صوبہ سرحد کے دورے پر جانے کے لیے اسلام آباد پہنچے تو انہیں واپس کراچی بھیجوادیا گیا تھا۔

تیس دسمبر سے وہ دوبئی میں اپنی فیملی کے ہمراہ رہائش پذیر ہیں۔