مبشر زیدی بی بی سی اردو ڈاٹ کام،اسلام آباد

عدالت نے تمام دلائل سننے کے بعد اس کیس کی سماعت کے لیے بڑا بنچ تشکیل دینے کا اعلان کیا

سپریم کورٹ کے تین رکنی بنچ نے جس کی سربراہی چیف جسٹس آف پاکستان ناظم حسین صدیقی کر رہے تھے ان چھ آئینی درخواستوں کو سماعت کے لیے منظور کر لیا جن میں صدر جنرل پرویز مشرف کے دو عہدوں پر فائز ہونے اور سترہویں ترمیم کو غیر آئینی قرار دینے کی استدعا کی گئی ہے۔

یہ درخواستیں پاکستان لائرز فورم،الجہاد ٹرسٹ،انجینئر جمیل،وطن پارٹی اور مولوی اقبال حیدر کی طرف سے دائر کی گئی ہیں۔

پاکستان لائرز فورم کے وکیل اے کے ڈوگر نے اپنے ابتدائی دلائل میں کہا کہ سترہویں ترمیم سے آئین میں وزیراعظم کو دیے گئے اختیارات صدر کو منتقل کر دیے گئے ہیں جو غیر قانونی ہیں۔

انہوں نے کہا کہ عدالت صدر جنرل مشرف کو حکم دے کہ وہ افواج پاکستان کے سربراہان کی تعیناتی سمیت تمام اختیارات واپس وزیراعظم کو تفویض کر دیں۔

انہوں نے یہ بھی کہا کہ بھارت کی سپریم کورٹ نے کئی مرتبہ پارلیمنٹ کی طرف سے آئین میں کی گئی ترامیم کو آئین کے منافی ہونے کے سبب غیر قانونی قرار دیا ہے۔

الجہاد ٹرسٹ کے وکیل وہاب الخیری نے کہا کہ سترہویں ترمیم میں عدلیہ کے مخالف کئی چیزیں شامل کی گئی ہیں جن میں ججوں کی ریٹائرمنٹ کی عمر زیادہ کرنے کے فیصلے کو واپس لینا بھی شامل ہے۔

عدالت نے عدلیہ سے متعلق ان معاملات پر حکومت کو الگ سے نوٹس جاری کیا ہے جس میں حکومت سے عدلیہ سے متعلق معاملات پر تین ہفتوں میں جواب داخل کرنے کے لیے کہا گیا ہے۔

عدالت نے تمام دلائل سننے کے بعد اس کیس کی سماعت کے لیے بڑا بنچ تشکیل دینے کا اعلان کیا اور کیس کی سماعت غیر معینہ مدت تک کے لیے ملتوی کر دی۔