مبشر زیدی
بی بی سی اردو ڈاٹ کام اسلام آباد |  |
|  بلوچ قوم اور بلوچستان پر غیر ضروری دباؤ ڈالا جارہا ہے: امان اللہ کنرانی |
بلوچستان کے علاقے سوئی میں مبینہ طور پر زیادتی کا شکار ہونے والی ڈاکٹر شازیہ خالد جمعہ کو اسلام آباد سے بیرون ملک روانہ ہو گئیں ہیں۔ وفاقی وزیر اطلاعات نے بی بی سی سے بات کرتے ہوئے ڈاکٹر شازیہ کی روانگی کی تصدیق کی ہے۔ تاہم ان کا کہنا ہے کہ ڈاکٹر شازیہ کو خواتین کے حقوق کے لئے کام کرنے والی غیر سرکاری تنظیموں نے بیرون ملک بھیجا ہے۔ ایک نجی ٹی وی چینل کا دعوی ہے کہ ڈاکٹر شازیہ کو لندن لے جایا گیا ہے۔ لیڈی ڈاکٹر شازیہ خالد کو دو اور تین جنوری کی رات کو سوئی گیس پلانٹ میں ان کے ہوسٹل میں مبینہ زیادتی کا نشانہ بنایا گیا تھا۔ پاکستان کی پارلیمنٹ کے مطابق اس واقعے کو پی پی ایل کی انتظامیہ نے دانستہ چھپایا اور پولیس میں بھی اس کیس کی رپورٹ درج نہیں ہونے دی اور لیڈی ڈاکٹر کو خفیہ طور پر ایک چارٹرڈ طیارے میں کراچی منتقل کر دیا گیا۔ اس کیس کے سامنے آنے کے بعد بلوچ ہتھیار بندوں اور فوج کے درمیان شدید تصادم ہوا اور راکٹ حملوں میں سوئی گیس پلانٹ کو بھی کافی نقصان پہنچا۔ اس تصادم میں چار سیکیورٹی اہلکارو سمیت آٹھ افراد ہلاک ہوئے تھے۔ اس واقعے پر ملک بھر خصوصاً بلوچستان میں شدید احتجاج کیا گیا تھا۔پارلیمنٹ میں بھی گذشتہ دو مہینوں سے یہ مسئلہ زیر بحث آتا رہا ہے اور سینیٹ کی سٹینڈنگ کمیٹی کی ایک تحقیقاتی رپورٹ بھی پیش کی گئی ہے جس میں پی پی ایل کی انتظامیہ کو اس واقعے کا ذمہ دار ٹھہرایا گیا ہے۔ تاہم اپوزیشن جماعتوں کا کہنا ہے کہ اس رپورٹ میں اس کیس کے مبینہ ملزم کیپٹن حماد کا ذکرتک نہیں کیا گیا اور نہ ہی اس کو کمیٹی کے روبرو پیش کیا گیاجس کے بعد یہ رپورٹ بالکل بے معنی ہے۔ حکام کا کہنا ہے کہ ڈاکٹر شازیہ کے کیس میں ملوث ملزمان کے ڈی این اے ٹیسٹ فوج کے کپتان سمیت تحویل میں لئے گئے کسی فرد سے نہیں ملا۔ انسانی حقوق اور خواتین کے لئے کام کرنے والی غیر سرکاری تنظیموں نے اس سال مارچ میں منائے جانے والے خواتین کے حقوق کے عالمی دن کے موقع پر ڈاکٹر شازیہ خالد کا مسئلہ نمایاں رہا اور ملک بھر میں ان تنظیموں نے حکومت سے ڈاکٹر شازیہ کیس میں حکومت سے انصاف کا تقاضا کیا۔ صدر جنرل پرویز مشرف نے اس کیس میں فوجی کپتان کی نامزدگی کو غلط اور بے بنیاد قرار دیا ہے اور اس کیس میں ہائی کورٹ کے جج کی زیر نگرانی بنائے گئے ٹریبیونل کا فیصلہ آنے سے پہلے ہی فوجی کپتان کو بے گناہ قرار دے دیا تھا۔ تحقیقاتی ٹریبیونل نے اپنی رپورٹ میں اس بات کی تصدیق کی ہے کہ ڈاکٹر شازیہ کے ساتھ زیادتی کی گئی ہے۔ | 
یہ صفحہ دوست کو ای میل کیجیئے
پرِنٹ کریں
