ہارون رشید بی بی سی اردو ڈاٹ کام، پشاور

تاجر برادری نے اعلان کیا ہے کہ پیٹرولیم مصنوعات میں کمی نہ کرنے کی صورت میں احتجاج جاری رہے گا

’تاجر گرینڈ الائنس‘ نے بڑھتی ہوئی مہنگائی اور پیٹرولیم مصنوعات کی قیمتوں میں گزشتہ دنوں زبردست اضافے کے خلاف مظاہرہ کیا۔ گزشتہ دس روز میں پشاور میں یہ دوسرا احتجاجی مظاہرہ ہے۔

بڑی تعداد میں مظاہرین نے ہشتنگری سے سوئیکارنو چوک تک پیدل مارچ کیا اور حکومت کے خلاف نعرہ بازی کی۔ انہوں نے سیاہ پرچم اور بینرز بھی اٹھا رکھے تھے۔

تاجر برادری کے رہنماؤں نے اپنے خطاب میں ایک ہفتے کے اندر قیمتوں میں کمی کا اعلان نہ کرنے پر اپنا احتجاج جاری رکھنے بلکہ اسے صوبائی سطح تک پھیلانے کی دھمکی بھی دی۔ مظاہرین نے سیاستدانوں کے اس عوامی مسئلہ پر خاموشی اختیار کرنے پر بھی تنقید کی۔

ملک میں حالیہ مہنگائی کی لہر کے خلاف عوامی سطح پر بظاہر اتنا شدید ردعمل سامنے نہیں آیا جتنا کہ توقع کی جا رہی تھی۔