ہارون رشید بی بی سی اردو ڈاٹ کام، پشاور

پشاور کے ماضی کی تلاش میں ماہرین نے ایک ہزار قدیم ہندو شاہی دور تک رسائی حاصل کر لی ہے

فی الحال ماہرین نے جو بارہ فٹ تک کھدائی کی ہے اس میں انہیں ایک ہزار سال پرانے ہندوشاہی زمانے کے نوادرات تک رسائی حاصل ہوئی ہے۔

ماہرین کے مطابق پشاور ناصرف پاکستان بلکہ جنوبی ایشیا کے قدیم ترین مگر زندہ شہروں میں سے ایک ہے۔ لیکن یہ شہر کتنا قدیم ہو سکتا ہے اس بارے میں ماہرین کی رائے واضع نہیں ہے۔

اس کمی کو دور کرنے کے لیے صوبائی محکمہ آثار قدیمہ نے شہر کے وسعت میں سب سے اونچے تاریخی مقام گور کھٹری میں گزشتہ تین برسوں سے زائد عرصے سے کھدائی کا کام جاری کر رکھا ہے۔

لیکن اس تحقیق کے منتظمین کا کہنا ہے کہ یہ کھدائی فنڈز کی کمی کے باعث انتہائی سست روی کا شکار ہے۔ اب ایک مرتبہ پھر کچھ فنڈز کی دستیابی کے بعد یہ کھدائی دوبارہ شروع کر دی گئی ہے۔

پشاور کا وہ مقام جہاں ماہرینِ آثار قدیمہ کھدائی کر رہے ہیں

اس سے قبل کیا شہر کی تاریخ معلوم کرنے کی کوئی کوشش ہوئی اس بارے میں آثار قدیمہ کے محکمے کے ڈائریکٹر پروفیسر ڈاکٹر احسان علی کا کہنا تھا کہ انگریزوں نے شاہ جی کی ڈھیری کے مقام پر انیس سو پانچ میں کھدائی کی تھی لیکن وہ افق کے متوازی تھی زمین کے اندر نہیں تھی۔ پھر پشاور یونیورسٹی کے سابق وائس چانسلر ڈاکٹر فرزند علی درانی نے انیسو بانوے میں کوشش کی تھی لیکن اڑتالیس فٹ تک کھدائی کے بعد مزید نیچے جانے کی لیے ان کے پاس جگہ نہیں بچی تھی۔

اس کوشش کے دوران پشاور کا تئیس سو سالہ مورینز تک کے دور کا پروفائل ہی تیار کرسکے۔

ماہرین مزید کتنی کھدائی کا ارادہ رکھتے ہیں اس بارے میں ڈاکٹر احسان نے بتایا کہ وہ ’ورجن سوائل‘ تک پہنچنا چاہتے ہیں جس کے لیے مزید چار سال کا عرصہ لگ سکتا ہے بشرطیکہ کہ کھدائی مسلسل جاری رہے۔

پشاور سے دستیاب بعض آثارِ قدیمہ

اس سے سیر و تفریح کے لیے یہاں آنے والوں کو شہر کی ماضی کے بارے میں معلومات بھی میسر آئیں گی۔ اس عمارت کے مشرقی اور مغربی دروازوں کی مرمت کا کام جاری ہے جبکہ عمارت کے دیگر حصوں کو بھی بچانے کی کوشش کی جا رہی ہے۔

آثار قدیمہ کی تلاش کا کام وسائل اور وقت کا متقاضی رہتا ہے۔ دیکھنا یہ ہے کہ صوبائی حکومت یہ دونوں کب تک مہیا کر سکتی ہے۔