ہارون رشید بی بی سی اردو ڈاٹ کام، پشاور

ماضی قریب میں کوئٹہ میں بھی دھماکے ہو چکے ہیں (فائل فوٹو)

بنوں پولیس کے مطابق دھماکہ اندرونِ شہر منڈان چوک میں ایک مصالحہ فروش کی دوکان میں ہوا۔ دھماکہ سے دکاندار ہارون موقعہ پر ہی ہلاک جبکہ آٹھ افراد زخمی ہو گئے۔ بنوں پولیس کے مطابق ہلاک ہونے والے کا تعلق کالعدم تنظیم جیش محمد سے تھا۔

پولیس کا کہنا ہے کہ ابتدائی تفتیش کے مطابق دھماکہ اینٹی پرسنل مائن کا نتیجہ تھا۔ جائے وقوعہ سے پولیس کو ایک پلاس بھی ملا ہے جس سے حکام کو شک ہے کہ ہلاک ہونے والا شخص بم سے چھیڑ چھاڑ کر رہا تھا کہ دھماکہ ہوگیا۔

زخمیوں میں تین کی حالت تشویشناک بتائی جاتی ہے جنہیں طبی امداد کے لیے پشاور منتقل کر دیا گیا ہے۔

پولیس تفتیش جاری رکھے ہوئے ہے البتہ کسی گرفتاری کی کوئی اطلاع نہیں ہے۔

بنوں انتظامیہ کے مطابق اس واقعہ کو فی الحال وزیرستان کی صورتحال سے منسلک نہیں کیا جا سکتا۔

اس سے قبل بنوں شہر میں ماضی قریب ہی میں نامعلوم افراد کی جانب سے راکٹ حملے تو ہوئے تھے لیکن بم دھماکے کا یہ پہلا واقعہ ہے۔