اعجاز مہر بی بی سی اردو ڈاٹ کام، اسلام آباد

صدر مشرف کی وردی کے بارے میں بل پر خواتین ارکان کا احتجاج

جمعرات کی صبح اجلاس شروع ہوا تو وقفہ سوالات کے بعد بل پر بحث ابھی باقی تھی کہ پارلیمانی امور کے وزیر ڈاکٹر شیر افگن نے سپیکر چودھری امیر حسین سے کہا کہ بہت تقریریں ہوچکیں اب وہ صدر کے دو عہدے رکھنے کے متعلق بل پر کارروائی شروع کریں۔

سپیکر نے دوسری اور تیسری خواندگی چند منٹ میں مکمل کراتے ہوئے بل منظور کرنے کی تحریک پیش کی جو اکثریت رائے سے منظور ہوگئی۔

محمود خان اچکزئی اور اعتزاز احسن سمیت سینیئر پارلیمینٹیرین بھی سپیکر کے اس رویے پر شدید برہم ہوگئے۔ اچکزئی سپیکر کے ڈائیس پر پہنچ گئے اور ان کے آگے رکھا ہوا پی ٹی وی کا مائیک گرا دیا۔

حزب اختلاف نے بل کی منظوری کی مکمل کارروائی کو غیر قانونی قرار دینے کا مطالبہ کیا لیکن سپیکر نے ان کا مطالبہ مسترد کر دیا۔

متحدہ مجلس عمل نے سترہویں ترمیم کی حمایت کی تھی

حزب مخالف کے اراکین دیکھتے ہی دیکھتے نشستیں چھوڑ کر سپیکر کے آگے جمع ہوگئے اور سخت نعرے بازی کرتے رہے۔

متحدہ مجلس عمل کے رہنما لیاقت بلوچ نے الزام لگایا کہ سپیکر نے انتہائی جانبداری کا ثبوت دیا اور قواعد کی خلاف ورزی بھی کی ہے لہٰذا متحدہ حزب اختلاف نے سپیکر کے خلاف عدم اعتماد کی تحریک پیش کر دی ہے۔

تحریک پیش کرنے کے لیے 86 اراکین کے دستخط لازمی ہوتے ہیں لیکن اس تحریک پر 104 دستخط ہیں۔ یاد رہے کہ سپیکر کے خلاف پہلے بھی تحریک عدم اعتماد پیش کی گئی تھی جو مسترد ہوگئی تھی۔

قومی اسمبلی سے منظور کردہ یہ بل اب ستائیس اکتوبر کو طلب کردہ ایوان بالا یعنی سینیٹ میں منظوری کے لیے پیش کیا جائے گا۔ دونوں ایوانوں سے منظوری کے بعد جب صدر جنرل پرویز مشرف اس بل پر دستخط کریں گے تو یہ ایکٹ آف پارلیمینٹ بن جائے گا اور جب تک صدر کے عہدے پر جنرل پرویز مشرف ہیں اس وقت تک وہ آرمی چیف کا عہدہ بھی رکھ پائیں گے۔ یہ قانون اکتیس دسمبر 2004 سے نافذ العمل ہوگا۔

واضح رہے کہ حکومت اور متحدہ مجلس عمل میں ہونےوالے سمجھوتے کے نتیجے میں سترویں آئینی ترمیم منظور ہوئی تھی اور اکتیس دسمبر 2004 تک جنرل پرویز مشرف کو باوردی آئینی صدر تسلیم کر لیا گیا تھا۔

معاہدے کے بعد قوم سے خطاب میں جنرل مشرف نے مقررہ مدت تک وردی اتارنے کا اعلان کیا تھا لیکن اب حکمران جماعت کہتی ہے کہ ملکی مفاد میں صدر وردی نہ اتاریں۔

حکومت نے یہ بل اکتیس دسمبر کے بعد بھی صدر کے وردی میں رہنے کے لیے منظور کرایا ہے۔

سپیکر نے اجلاس کی کارروائی جمعہ کی صبح تک ملتوی کر دی جس کے بعد حزب اختلاف کے اراکین ایوان سے باہر پارلیمینٹ کی عمارت کے صدر دروازے پر جمع ہوگئے اور راستہ بلاک کر دیا۔ جس کی وجہ سے انتظامیہ کو متبادل راستے کھولنے پڑے۔

پیپلز پارٹی کے اراکین نے اس موقع پر’چاروں صوبوں کی زنجیر بینظیر‘ جبکہ حزب اختلاف کے دیگر اراکین نے ’الوداع جنرل مشرف الوداع‘ اور گو سپیکر گو کے نعرے لگائے۔

اس موقع پر حافظ حسین احمد نے صحافیوں کو بتایا کہ جمعہ کی صبح پارلیمینٹ ہاؤس میں مجلس عمل اور اتحاد برائے بحالی جمہوریت کے علیحدہ علیحدہ پارلیمانی پارٹیوں کے اجلاس ہوں گے جس کے بعد مشترکہ اجلاس میں سپیکر کے خلاف تحریک عدم اعتماد کے بارے میں حکمت عملی مرتب کی جائے گی۔

حکومت نے یہ بل بدھ کی شام شیڈول سے ہٹ کر اچانک قومی اسمبلی کا اجلاس بلا کر منظور کرانے کی کوشش کی تھی لیکن حزب اختلاف کی جانب سے شدید احتجاج کی وجہ سے بل منظور نہیں ہوسکا اور اجلاس کی کارروائی جمعرات تک ملتوی کردی گئی۔

ایک موقع پر جب مجلس عمل کے اراکین روسٹرم کے آگے احتجاج کر رہے تھے تو پیپلز پارٹی کے رہنما خورشید احمد شاہ نے انہیں کہا تھا کہ وہ نشستوں پر کھڑے ہوکر احتجاج کریں۔ جس پر خافظ حسین احمد اور خورشید شاہ کے درمیاں کھینچا تانی اور گرما گرمی اور تلخی بھی ہوئی تھی لیکن بعد میں حافظ حسین احمد اور مجلس عمل کے دیگر رہنماؤں نے خورشید شاہ سے معذرت کر لی تھی۔

حزب اختلاف کے رکن اسمبلی چودھری اعتزاز احسن نے بدھ کے روز اپنی تقریر میں اس بل کو غیر آئینی قرار دیتے ہوئے حکومتی بینچوں پر بیٹھنے والوں پر نکتہ چینی کرتے ہوئے کہا تھا کہ وہ پارلیمان کے وقار کو مجروح نہ کریں۔ جبکہ قاضی حسین احمد نے کہا تھا کہ انہوں نے فوج کو سیاست سے نکالنے کے لیے واپسی کا محفوظ راستہ دینے کے لیے سمجھوتہ کیا لیکن انہیں آج افسوس ہو رہا ہے جب صدر جنرل پرویز مشرف وعدے پر عمل کرتے ہوئے وردی نہیں اتار رہے۔